धाराशिव – शहरातील धारासुर मर्दिनी देवी मंदिराशेजारी, शेती आणि स्कुटीच्या वादातून ५१ वर्षीय व्यक्तीला काठी आणि लोखंडी रॉडने बेदम मारहाण केल्याची घटना घडली आहे. याप्रकरणी एका महिलेसह पाच जणांविरोधात धाराशिव शहर पोलीस ठाण्यात गुन्हा दाखल करण्यात आला आहे.
नानासाहेब मारुती नलावडे (वय ५१, रा. राघुचीवाडी, ता. जि. धाराशिव) असे मारहाण झालेल्या व्यक्तीचे नाव आहे. त्यांनी दिलेल्या फिर्यादीनुसार, दि. ५ ऑक्टोबर रोजी रात्री साडेआठच्या सुमारास धारासुर मर्दिनी देवी मंदिराशेजारील परिसरात ही घटना घडली. शेतीच्या वादातून आरोपी महादेव नानासाहेब नलावडे, शाम भारत सुरवसे, महेंद्र भारत सुरवसे, रुक्मिणी भारत सुवरसे आणि संदीप नानासाहेब नलवाडे (सर्व रा. धारासुर मर्दिनी देवी मंदिर शेजारी, धाराशिव) यांनी संगनमत करून फिर्यादी नानासाहेब नलावडे यांना शिवीगाळ केली.
यानंतर आरोपींनी त्यांना लाथाबुक्यांनी, काठीने आणि लोखंडी रॉडने मारहाण करून जखमी केले व जीवे मारण्याची धमकी दिली, असे फिर्यादीत म्हटले आहे.
या तक्रारीवरून धाराशिव शहर पोलिसांनी पाचही आरोपींविरोधात भारतीय न्याय संहितेच्या विविध कलमांनुसार (कलम ११८(१), ११५(२), ३५२, ३५१(२), १८९(२), १९१(२), १९०) गुन्हा नोंदवला आहे. पोलीस या प्रकरणाचा अधिक तपास करत आहेत.
