तुळजापूर: श्री तुळजाभवानी मंदिर विकास आराखडा आणि स्वनिधीतून होत असलेल्या मंदिर दुरुस्तीच्या कामात मंदिराचा मूळ गाभारा पाडला जाऊ नये, या भोपे पुजारी मंडळाच्या प्रमुख मागणीला मोठे यश आले आहे. मंदिराचा गाभारा (Garbhagriha) पूर्णतः न पाडता तो मूळ स्वरूपातच ठेवण्याचा महत्त्वपूर्ण निर्णय पुरातत्व विभागासोबत झालेल्या बैठकीत घेण्यात आला आहे.
भोपे पुजारी मंडळाचे अध्यक्ष अमरराजे कदम यांनी दिलेल्या माहितीनुसार, मंदिर विकास आराखड्यास मंडळाने पूर्वीपासूनच निवेदने देऊन व उपोषण करून तीव्र विरोध दर्शवला होता. मंदिराचा मूळ गाभारा पाडू नये, ही मंडळाची ठाम भूमिका होती.
नुकतीच राज्याच्या पुरातत्व वस्तुसंग्रहालयाचे संचालक डॉ. तेजस गर्गे यांच्या प्रमुख उपस्थितीत या संदर्भात एक महत्त्वाची बैठक पार पडली. या बैठकीत भोपे पुजारी मंडळाच्या मागण्यांवर अत्यंत सकारात्मक चर्चा झाली.
पुरातत्व विभागाने मान्य केलेल्या प्रमुख मागण्या:
-
देवीचे गर्भगृह पूर्णतः न पाडता, केवळ अंतराळ आणि शिखरांची दुरुस्ती केली जाईल.
-
मंदिराचा मूळ गाभारा (Sanctum) आहे तसाच मूळ स्वरूपात ठेवला जाईल.
-
देवीभक्तांची कुलधर्म-कुलाचार करण्याची पारंपरिक स्थळे पूर्वीप्रमाणेच कायम ठेवली जातील.
-
भवानी शंकर मंडपातील अनेक स्तंभांची (Pillars) दुरुस्ती केली जाईल.
-
मंदिराची पूर्वीची तटबंदी (Compound Wall) जशी आहे तशीच कायम ठेवली जाईल.
या सर्व मागण्यांबाबत संचालक, पुरातत्व विभाग यांच्याकडून लेखी पत्रच हाती मिळाल्याने, भोपे पुजारी मंडळाने राज्याच्या पुरातन विभागाचे आणि मंदिर संस्थानचे आभार व्यक्त केले आहेत.
या बैठकीसाठी पुरातत्व व वस्तुसंग्रहालय संचालक डॉ. तेजस गर्गे, उपसंचालक हेमंत दळवी, सहाय्यक संचालक श्रीमती जया वाहणे, जतन सहाय्यक आर.डी. निपाणे, भोपे पुजारी मंडळाचे अध्यक्ष अमरराजे कदम, पाळीकर पुजारी मंडळाचे उपाध्यक्ष विपीन शिंदे, मंदिर संस्थानचे सहा. व्यवस्थापक (स्थापत्य) आर.एम. भोसले, वास्तुविशारद श्रीमती तेजस्विनी आफळे, साईप्रेम कन्स्ट्रक्शनचे मुकेश जाधव आणि सवानी हेरिटेजचे राम सवानी हे उपस्थित होते.
