धाराशिव: धाराशिव नगरपरिषद निवडणुकीच्या तोंडावर ‘धाराशिव २.०’ (Dharashiv 2.0) या फेसबुक आणि इन्स्टाग्राम पेजवरून प्रसारित करण्यात आलेल्या फेक एक्झिट पोल प्रकरणाने आता राजकीय वळण घेतले आहे. या प्रकरणी शिवसेना (उद्धव बाळासाहेब ठाकरे) पक्षाने पत्रकार परिषद घेत गंभीर आरोप केले आहेत. “सदर पेजचा ॲडमिन हा भाजप आमदार राणाजगजितसिंह पाटील आणि त्यांचे पुत्र मल्हार पाटील यांचा कार्यकर्ता असून, पैसे घेऊन ही ‘पेड न्यूज’ चालवण्यात आली,” असा दावा ठाकरे गटाने केला आहे.
या प्रकरणी शिवसेना शहरप्रमुख सोमनाथ गुरव, युवासेना जिल्हाप्रमुख रवी वाघमारे आणि युवासेना तालुकाप्रमुख तसेच मूळ तक्रारदार राकेश सूर्यवंशी यांनी पत्रकार परिषद घेतली. यावेळी त्यांनी फेक एक्झिट पोलमागे मोठे षड्यंत्र असल्याचा आरोप केला.
शिवसेना ठाकरे गटाचे प्रमुख आरोप:
-
भाजप कार्यालयातून कामकाज: ज्या ‘धाराशिव २.०’ पेजवरून हा फेक व्हिडीओ व्हायरल झाला, त्याचा ॲडमिन नेहमी भाजपच्या कार्यालयात बसलेला असतो. तो आमदार राणा पाटील आणि मल्हार पाटील यांचा कार्यकर्ता असल्याचा दावा नेत्यांनी केला आहे.
-
पेड न्यूज आणि दिशाभूल: निवडणुकीच्या रिंगणात भारतीय जनता पक्षाचा उमेदवार लढतीत नसतानाही, तो विजयाच्या वाटेवर असल्याचे दाखवणारी ही बातमी पूर्णपणे खोटी आणि ‘पेड’ (Paid News) होती. ॲडमिनने पैसे घेऊन ही दिशाभूल केली आहे.
-
मास्टरमाइंड कोण?: हा केवळ एका ॲडमिनचा कारनामा नसून यामागे कुणीतरी मास्टरमाइंड आहे. हा व्हिडीओ कुणी बनवून दिला? कुणाच्या नंबरवरून तो ॲडमिनला पाठवण्यात आला? याचा शोध पोलिसांनी घेतला पाहिजे.
पोलिसांकडे मागण्या:
१. बँक खाती तपासा: सदर ॲडमिनला पैसे कुणी दिले आणि ही खोटी बातमी प्रसारित करण्यास सांगितले, हे शोधण्यासाठी त्याचे बँक डिटेल्स तपासण्यात यावेत.
२. साहित्य जप्त करा: ॲडमिनचा मोबाईल आणि लॅपटॉप तत्काळ जप्त करून फॉरेन्सिक तपासासाठी पाठवावा.
३. पेड न्यूजचा गुन्हा: या प्रकरणात केवळ आचारसंहिता भंगाचाच नाही, तर ‘पेड न्यूज’चा स्वतंत्र गुन्हा दाखल करण्यात यावा.
४. पेज बंद करा: संबंधित सोशल मीडिया पेज तात्काळ बंद करण्यात यावे.
३० नोव्हेंबर २०२५ रोजी सायंकाळी ‘धाराशिव २.०’ सह इतर काही पेजेसवर भाजप उमेदवार नेहा काकडे विजयी होत असल्याचा एक बनावट एक्झिट पोल व्हिडीओ प्रसारित झाला होता. या विरोधात पालिकेचे उपमुख्याधिकारी विश्वंभर सोनखेडकर यांनी दिलेल्या फिर्यादीवरून १२ डिसेंबर २०२५ रोजी सायबर पोलीस ठाण्यात गुन्हा दाखल करण्यात आला आहे. आता ठाकरे गटाच्या आरोपामुळे या तपासाला वेगळे वळण मिळण्याची शक्यता आहे.
