नळदुर्ग: गाडीला समोरून धडक दिल्याचा जाब विचारत एका व्यक्तीला लाथाबुक्क्यांनी आणि दगडाने बेदम मारहाण करून जीवे मारण्याची धमकी दिल्याचा प्रकार तुळजापूर तालुक्यातील काटगाव येथे घडला आहे. या हल्ल्यात एक जण गंभीर जखमी झाला असून, याप्रकरणी नळदुर्ग पोलीस ठाण्यात एकाच कुटुंबातील चौघांविरुद्ध गुन्हा दाखल करण्यात आला आहे.
अशोक बाबुराव वर्दे (वय ४५, रा. काटगाव, ता. तुळजापूर) असे जखमी व्यक्तीचे नाव आहे. याप्रकरणी त्यांची पत्नी अंबिका अशोक वर्दे (वय ३७) यांनी पोलिसांत फिर्याद दिली आहे.
पोलिसांनी दिलेल्या माहितीनुसार, ही घटना १९ जानेवारी २०२६ रोजी सकाळी १० वाजण्याच्या सुमारास काटगाव येथील लोकमंगल बँकेच्या बाजूला असलेल्या सिद्धू कस्तुरे यांच्या मोकळ्या जागेत घडली. आरोपी रमेश सुभाष गंगणे, राजू सुभाष गंगणे, सुभाष गंगणे आणि रेणुका गंगणे (सर्व रा. काटगाव) यांनी अशोक वर्दे यांना अडवले. “तू माझ्या गाडीला समोरून ठोकले,” असे म्हणत आरोपींनी त्यांना शिवीगाळ करण्यास सुरुवात केली. वाद वाढल्यानंतर आरोपींनी वर्दे यांना लाथाबुक्क्यांनी मारहाण केली तसेच दगडाने मारून गंभीर जखमी केले. यावेळी त्यांना जीवे ठार मारण्याची धमकीही देण्यात आली.
या घटनेनंतर जखमीच्या पत्नी अंबिका वर्दे यांनी नळदुर्ग पोलीस ठाणे गाठून तक्रार दाखल केली. त्यांच्या फिर्यादीवरून पोलिसांनी वरील चारही आरोपींविरुद्ध भारतीय न्याय संहिता (BNS) कलम ११८(२) (स्वेच्छेने दुखापत करणे), ११५(२), ३५२, ३५१(२) आणि ३(५) अन्वये गुन्हा नोंदवला आहे. नळदुर्ग पोलीस या प्रकरणाचा अधिक तपास करत आहेत.
