धाराशिव – जिल्ह्यात चोरीच्या घटनांमध्ये वाढ झाली असून, तुळजापूर, बेंबळी, येरमाळा आणि भूम पोलीस ठाण्याच्या हद्दीत गुन्हे दाखल झाले आहेत. तुळजाभवानी मंदिरात चोरी करणाऱ्या तीन महिलांना पोलिसांनी तत्काळ अटक केली आहे, तर मेडसिंगा येथे घरफोडी करून चोरट्यांनी ऐवज लंपास केला आहे.
तुळजाभवानी मंदिरात चोरी; तीन महिला आरोपी अटकेत
पुणे येथील भाविक कल्पना सतीश गांगुर्डे (३३, रा. चिखली) या २० जानेवारी रोजी दुपारी १२:३० वाजता तुळजाभवानी मातेच्या दर्शनासाठी आल्या होत्या. यावेळी गर्दीचा फायदा घेऊन तीन महिलांनी त्यांच्या पर्समधील १२,००० रुपये चोरले. फिर्यादीने दिलेल्या वर्णनावरून पोलिसांनी तत्काळ तपास करून खालील तीन महिलांना ताब्यात घेतले:
-
सरोजा प्रेम पवार (२५, रा. चिंचोली, ता. तुळजापूर)
-
करीना अमोल पवार (२२, रा. जुना बस डेपो, धाराशिव)
- वैशाली प्रकाश शिंदे (४०, रा. मोहोळ चौक, वैराग, जि. सोलापूर)
चौकशीदरम्यान या तिघींनी गुन्ह्याची कबुली दिली असून त्यांच्यावर गुन्हा दाखल करण्यात आला आहे.
मेडसिंग्यात घरफोडी आणि दोन दुचाकी लंपास
बेंबळी पोलीस ठाण्यांतर्गत येणाऱ्या मेडसिंगा गावात चोरट्यांनी धुमाकूळ घातला. फिर्यादी रामेश्वर विठ्ठल गोरे (३१) यांच्या घराचे कुलूप तोडून चोरट्यांनी कपाटातील ८ ग्रॅम सोन्याचे व चांदीचे दागिने आणि २० हजार रोख असा एकूण ७२,००० रुपयांचा ऐवज चोरून नेला. ही घटना १९ ते २० जानेवारीच्या दरम्यान घडली.
विशेष म्हणजे, याच वेळी गावातील रामेश्वर बळीराम साठे आणि किशोर मारुती आगळे यांच्याही दुचाकी चोरीस गेल्या आहेत. याप्रकरणी भारतीय न्याय संहिता (BNS) कलम ३३१(४), ३०५(ए), ३३४(१), ३०३(२) अन्वये गुन्हा दाखल झाला आहे.
हाडांग्री येथून दुचाकी चोरी
भूम तालुक्यातील हाडांग्री येथे सूर्यकांत दत्तात्रय तळेकर (५८) यांची ‘स्प्लेंडर प्लस’ (MH 25 D 7324) ही १५,००० रुपये किमतीची दुचाकी त्यांच्या घरासमोरून चोरीस गेली. ही घटना १७ ते १८ जानेवारीच्या दरम्यान घडली.
येरमाळा येथेही दुचाकी चोरीचा गुन्हा दाखल
रमेश धर्मराज माळी (३५, रा. आंबे सावली, जि. बीड) यांची ४०,००० रुपये किमतीची ‘हिरो होंडा प्रो’ (MH 23 Z 111) ही दुचाकी येरमाळा येथून चोरीस गेली होती. ही घटना एप्रिल २०२५ मध्ये घडली होती, मात्र याची फिर्याद २० जानेवारी २०२६ रोजी देण्यात आली असून गुन्हा दाखल करण्यात आला आहे.
