तेर: ज्यांच्या करारी आवाजाने मंत्रालय दणाणून जायचे, असे महाराष्ट्राचे लाडके नेतृत्व आणि राज्याचे उपमुख्यमंत्री अजितदादा पवार यांच्यावर काळाने घाला घातला आहे. बुधवारी सकाळी बारामती येथे झालेल्या दुर्दैवी विमान अपघातात अजितदादांचे अकाली निधन झाले. या वृत्ताने केवळ बारामतीच नव्हे, तर संपूर्ण महाराष्ट्र हादरला आहे. मात्र, या धक्क्याने सर्वाधिक हळहळ व्यक्त होत आहे ती दादांची ‘सासुरवाडी’ असलेल्या धाराशिव जिल्ह्यातील तेर गावात.
अतूट नात्याचा शोकांत
तेर हे अजितदादांचे सासर. ३० डिसेंबर १९८५ रोजी माजी मंत्री डॉ. पद्मसिंह पाटील यांची बहीण सुनेत्रावहिनी यांच्याशी दादांचा विवाह झाला आणि तेरशी त्यांचे रक्तापलीकडचे नाते जडले. “अजितदादा आमच्या गावचे जावई आहेत,” ही भावनाच गावकऱ्यांसाठी उर भरून येणारी आणि गर्वाची होती. मात्र, नियतीने हा अभिमान बाळगणारा आधारवडच अचानक हिरावून नेल्याने संपूर्ण गाव पोरके झाले आहे.
स्वागताच्या ठिकाणी आज श्रद्धांजलीचे फलक
गावातील वातावरण आज अत्यंत हेलावणारे आहे. एरवी अजितदादांची कोणतीही निवड झाली किंवा ते गावात येणार असले की, चौकाचौकात त्यांच्या स्वागताचे आणि अभिनंदनाचे मोठमोठे होर्डिंग्ज दिमाखात लागायचे. ढोल-ताश्यांच्या गजरात आपल्या लाडक्या जावयाचे स्वागत व्हायचे.
परंतु, आज नियतीचा खेळ असा की, ज्या ठिकाणी स्वागताचे बॅनर लागायचे, त्याच जागी आज दादांना ‘भावपूर्ण श्रद्धांजली’ वाहणारे बॅनर लावण्याची वेळ गावकऱ्यांवर आली आहे. हे दृश्य पाहताना गावातील प्रत्येकाचे काळीज पिळवटून निघत आहे.
गाव १०० टक्के बंद
दादांच्या निधनाचे वृत्त समजताच तेर गावात उत्स्फूर्तपणे १०० टक्के बंद पाळण्यात आला. गावातील रस्ते सुने झाले असून, प्रत्येक घरातून केवळ हळहळ व्यक्त होत आहे. “दादा आमच्यातून इतक्या अचानक निघून जातील असे स्वप्नातही वाटले नव्हते, हे दुःख शब्दांत व्यक्त करण्यापलीकडचे आहे,” अशा भावना ग्रामस्थांनी व्यक्त केल्या.
बारामतीत दादांच्या पार्थिवावर अंत्यसंस्कार झाले असले, तरी त्यांच्या आठवणींच्या रूपाने सासुरवाडीच्या प्रत्येक ग्रामस्थाच्या मनात ते कायम अमर राहतील. तेरकरांचा लाडका जावई आज अनंताच्या प्रवासाला निघून गेला आहे.
