धाराशिव : शिवसेना (उद्धव बाळासाहेब ठाकरे) पक्षाकडून समाधान मनोहर उघडे यांची पक्षातून तत्काळ हकालपट्टी करण्यात आल्याची अधिकृत माहिती प्रसिद्धिपत्रकाद्वारे देण्यात आली आहे. त्यांच्या विरोधात अफू (Afu) लागवडीप्रकरणी पोलिसांनी कायदेशीर कारवाई केल्यानंतर हा निर्णय घेण्यात आला आहे.
मिळालेल्या माहितीनुसार, समाधान उघडे (रा. तसमगाव, ता. वाशी, जि. धाराशिव) यांनी स्वतःच्या शेतीमध्ये अफूची लागवड केल्याचा प्रकार समोर आला होता. या प्रकरणी पोलिसांनी कारवाई केल्यानंतर पक्षाच्या स्तरावरही चौकशी करण्यात आली. संबंधित कृत्यामुळे पक्षाच्या प्रतिमेला धक्का बसल्याचे नमूद करण्यात आले आहे.
खासदार ओमराजे यांनी फेसबुक पोस्टद्वारे यासंदर्भात भूमिका स्पष्ट करताना म्हटले आहे की, “समाधान उघडे यांनी केलेले बेकायदेशीर कृत्य गंभीर स्वरूपाचे असून त्यामुळे पक्षाची प्रतिमा मलिन झाली आहे. पक्षाच्या विचारसरणीला व संघटनात्मक शिस्तीला बाधा आणणाऱ्या कोणत्याही कृत्याला शिवसेना (उद्धव बाळासाहेब ठाकरे) पक्षात थारा नाही.”
दरम्यान, पक्षप्रमुख उद्धव बाळासाहेब ठाकरे यांच्या आदेशानुसार समाधान उघडे यांची प्राथमिक सदस्यत्वासह सर्व पदांवरून तत्काळ प्रभावाने हकालपट्टी करण्यात आल्याचे प्रसिद्धिपत्रकात नमूद करण्यात आले आहे. तसेच पक्षातील सर्व पदाधिकारी व कार्यकर्त्यांनी पक्षशिस्तीचे काटेकोर पालन करावे, असे आवाहनही करण्यात आले आहे.
समाधान उघडे यांच्यावर एनडीपीएस अंतर्गत गुन्हा
वाशी तालुक्यातील मौजे दशमेगाव शिवारात अवैध अफू लागवडीचा मोठा प्रकार स्थानिक गुन्हे शाखेने उघडकीस आणला आहे. या कारवाईत तब्बल 485.65 किलो वजनाची अंदाजे 72 लाख 84 हजार 750 रुपयांची अफूची झाडे जप्त करण्यात आली आहेत.
सर्वे क्र. 163, मौजे दशमेगाव (ता. वाशी, जि. धाराशिव) येथे भेट दिली असता कांद्याच्या आंतरपिकामध्ये मोठ्या प्रमाणात अफूची लागवड केल्याचे आढळून आले. संबंधित झाडांना पांढरी व गुलाबी रंगाची फुले तसेच मोठी बोंडे असल्याचे निदर्शनास आले.
हे शेत समाधान मनोहर उघडे (रा. दशमेगाव, ता. वाशी) यांचे असल्याची माहिती समोर आली. आजूबाजूच्या शेतकऱ्यांनीही त्यांच्याच मार्फत लागवड केल्याचे सांगितले. त्यानंतर नायब तहसीलदार किसन सांगळे व दोन शासकीय पंचांच्या उपस्थितीत 485.65 किलो वजनाची अफूची झाडे जप्त करण्यात आली.
