ढोकी: रस्त्यावरून जाणाऱ्या एका ६६ वर्षीय वृद्धाला अडवून, “आम्ही सीआयडी (CID) अधिकारी आहोत” असे सांगत दोन अज्ञातांनी हातचलाखीने त्यांच्या हातातील सोन्याच्या अंगठ्या काढून घेतल्याची घटना घडली आहे. ढोकी पोलीस ठाण्याच्या हद्दीत तेरणा प्रकल्प सप्लाय बिल्डिंगजवळ हा प्रकार घडला असून, याप्रकरणी ढोकी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, सतीश विठ्ठल दंडनाईक (वय ६६, रा. पळसप, ता. जि. धाराशिव) असे फसवणूक झालेल्या वृद्धाचे नाव आहे. सतीश दंडनाईक हे १२ फेब्रुवारी २०२६ रोजी सकाळी पावणे अकराच्या सुमारास (१०.४५ वा.) आपल्या स्कुटीवरून (क्र. एमएच २५ – ५२२१) पळसप येथून तेर-ढोकी मार्गे कोल्हेगाव येथे जात होते.
तेरणा प्रकल्प सप्लाय बिल्डिंगजवळ ते आले असता, पाठीमागून आलेल्या दोन अज्ञात व्यक्तींनी त्यांना आवाज देऊन गाडी थांबवण्यास सांगितले. त्यानंतर, “आम्ही सीआयडी आहोत,” अशी बतावणी करत दंडनाईक यांचा विश्वास संपादन केला. या तोतया अधिकाऱ्यांनी दंडनाईक यांच्या हातातील १४ ग्रॅम वजनाच्या दोन सोन्याच्या अंगठ्या (किंमत अंदाजे ७४,००० रुपये) काढून घेतल्या आणि तिथून पोबारा केला.
या घटनेनंतर सतीश दंडनाईक यांनी १३ फेब्रुवारी २०२६ रोजी ढोकी पोलीस ठाण्यात तक्रार दाखल केली. त्यांच्या फिर्यादीवरून दोन अज्ञात व्यक्तींविरुद्ध भारतीय न्याय संहिता (BNS) कलम ३१८ आणि ३(५) अन्वये गुन्हा दाखल करण्यात आला आहे. ढोकी पोलीस अधिक तपास करत आहेत.
