धाराशिव: फिरायला नेण्याचा बहाणा करून एका १७ वर्षीय अल्पवयीन मुलीला लॉजवर नेऊन तिच्यावर लैंगिक अत्याचार केल्याची धक्कादायक घटना धाराशिव जिल्ह्यात उघडकीस आली आहे. याप्रकरणी पीडित मुलीच्या आईने दिलेल्या तक्रारीवरून तरुणाविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना १ जानेवारी २०२६ रोजी सायंकाळी ७ वाजताच्या सुमारास घडली. आरोपी तरुणाने गावातीलच एका १७ वर्षीय मुलीला “तुला मोटारसायकलवर फिरायला घेऊन जातो,” असे सांगून सोबत नेले. त्यानंतर तिला एका लॉजवर नेऊन तिच्यावर जबरदस्तीने लैंगिक अत्याचार केला.
या घटनेनंतर पीडित मुलगी घाबरलेली होती. अखेर १४ फेब्रुवारी २०२६ रोजी पीडितेच्या आईने याप्रकरणी पोलिसांत धाव घेतली. त्यांनी दिलेल्या फिर्यादीवरून संबंधित तरुणाविरुद्ध भारतीय न्याय संहिता (BNS) कलम १३७(२) (अपहरण), ६४(२) (बलात्कार) तसेच बालकांचे लैंगिक अपराधांपासून संरक्षण कायदा (POCSO) कलम ४ आणि ६ अन्वये गुन्हा दाखल करण्यात आला आहे. पोलीस या प्रकरणाचा अधिक तपास करत आहेत.
