वाशी: जुन्या भांडणाचा राग मनात धरून एका ३५ वर्षीय तरुणाला लोखंडी गजाने आणि काठीने बेदम मारहाण करून गंभीर जखमी केल्याची घटना वाशी तालुक्यातील पारगाव येथे घडली. याप्रकरणी वाशी पोलीस ठाण्यात तिघांविरुद्ध गुन्हा दाखल करण्यात आला आहे.
सुनील बब्रुवान बाराते (वय ३५, रा. जानकापूर, ता. वाशी) असे जखमी तरुणाचे नाव आहे. याप्रकरणी पशुपती पांडुरंग राहिज, अमर आबाजी राहिज आणि अमोल आश्रुबा सोनटक्के (सर्व रा. पारगाव, ता. वाशी) यांच्यावर गुन्हा दाखल झाला आहे.
पोलिसांनी दिलेल्या माहितीनुसार, ही घटना ११ फेब्रुवारी २०२६ रोजी रात्री ८:४३ ते ९:३० वाजण्याच्या सुमारास घडली. फिर्यादी सुनील बाराते हे पारगाव येथील शंकर साखर कारखाना परिसर आणि रामदास मोटे यांच्या दुकानासमोर असताना, आरोपींनी त्यांना गाठले. मागील भांडणाचे कारण काढून आरोपींनी सुनील यांना शिवीगाळ करण्यास सुरुवात केली. त्यानंतर लाथाबुक्क्यांनी मारहाण करत, लोखंडी गज आणि काठीने मारून त्यांना गंभीर जखमी केले. तसेच, जीवे ठार मारण्याची धमकीही दिली.
या घटनेनंतर जखमी सुनील बाराते यांनी १४ फेब्रुवारी २०२६ रोजी वाशी पोलीस ठाण्यात फिर्याद दिली. त्यावरून पोलिसांनी भारतीय न्याय संहिता (BNS) कलम ११८(२), ११८(१) (दुखापत करणे), ११५(२), ३५२, ३५१(२), ३५१(३) (धमकी देणे) आणि ३(५) (समान उद्देश) अन्वये गुन्हा दाखल केला आहे. पुढील तपास वाशी पोलीस करत आहेत.
