शिवजयंतीनिमित्त ‘राजा शिवाजी’चा दमदार फर्स्ट लूक प्रदर्शित

मुंबई : छत्रपती शिवाजी महाराजांच्या जयंतीनिमित्त बहुप्रतीक्षित ऐतिहासिक चित्रपट **‘राजा शिवाजी’**चा पहिला पोस्टर आणि फर्स्ट लूक आज अधिकृतपणे प्रदर्शित करण्यात आला. जिओ स्टुडिओज आणि मुंबई फिल्म कंपनी निर्मित या चित्रपटाचे दिग्दर्शन तसेच प्रमुख भूमिका अभिनेता रितेश विलासराव देशमुख साकारत असून त्यांनी स्वतः सोशल मीडियावर हा दमदार पोस्टर शेअर केला.

प्रदर्शित पोस्टरमध्ये रितेश देशमुख छत्रपती शिवाजी महाराजांच्या रूपात अत्यंत प्रभावी आणि दिमाखदार अंदाजात दिसत आहेत. हातात घट्ट पकडलेली तलवार, ताठ उभे खांदे, निर्धारपूर्ण नजर आणि वादळापूर्वीची शांतता दर्शवणारा भाव — स्वराज्य स्थापनेच्या शपथेचा आणि राष्ट्राच्या अभिमानाचा क्षण या पोस्टरमधून प्रभावीपणे साकारण्यात आला आहे.

पोस्टरसह शेअर करण्यात आलेल्या संदेशात स्वराज्याच्या जन्माची प्रेरणादायी कथा मांडण्यात आली आहे — “अंधाराला जेव्हा प्रकाशाची आस लागली, तेव्हा एक ज्योत प्रज्वलित झाली… इतिहास जेव्हा थांबला, तेव्हा एका तरुण योद्ध्याने तो नव्याने लिहिण्याचा निर्णय घेतला… भूमीला स्वाभिमान हवा होता, तेव्हा एका सुपुत्राने शपथ घेतली आणि स्वराज्याचा जन्म झाला.”

‘राजा शिवाजी’ हा पॅन-इंडिया स्तरावरील भव्य ऐतिहासिक अ‍ॅक्शन-ड्रामा असून मराठी आणि हिंदी अशा द्विभाषिक स्वरूपात तयार करण्यात येत आहे. आंतरराष्ट्रीय दर्जाची भव्यता आणि दृश्यवैभव यासाठी प्रसिद्ध छायाचित्रकार संतोष सिवन यांचे छायांकन तर संगीताची जबाबदारी सुप्रसिद्ध जोडी अजय–अतुल यांच्याकडे आहे.

चित्रपटात विद्या बालन, अभिषेक बच्चन, संजय दत्त यांच्यासह अनेक दिग्गज कलाकारांची भूमिका असून, हा चित्रपट केवळ एका राजाची कथा नसून स्वराज्यासाठी प्रचंड शक्तींविरुद्ध उभ्या राहिलेल्या एका सुपुत्राचा प्रेरणादायी प्रवास दाखवणार आहे. गुलामीपेक्षा बंडाची वाट निवडून भारताच्या प्रतिकार चळवळीला दिशा देणाऱ्या राष्ट्रीय योद्ध्याची ही गाथा जागतिक स्तरावर पोहोचवण्याचा निर्मात्यांचा प्रयत्न आहे.

चित्रपटाचे चित्रीकरण पूर्ण झाल्यानंतर रितेश देशमुख यांनी भावना व्यक्त करत सांगितले की, “१०० हून अधिक दिवस आमच्या संपूर्ण टीमने मन, आत्मा आणि समर्पणाने या स्वप्नासाठी काम केले. आता भारतातील महान योद्धे छत्रपती शिवाजी महाराजांना भव्य सिनेमॅटिक आदरांजली सादर करण्यासाठी आम्ही सज्ज आहोत.”

ज्योती देशपांडे आणि जेनेलिया देशमुख निर्मित हा चित्रपट १ मे २०२६ रोजी जगभरातील चित्रपटगृहांत प्रदर्शित होणार असून, भारतीय इतिहासाची ही गौरवगाथा जागतिक पातळीवर पोहोचवण्याचा निर्मात्यांचा मानस आहे.

दरम्यान, पोस्टर प्रदर्शित होताच सोशल मीडियावर चित्रपटाची जोरदार चर्चा सुरू झाली असून शिवप्रेमींमध्ये उत्सुकता शिगेला पोहोचली आहे.

जय शिवराय!