धाराशिव: ग्रामपंचायतीच्या भ्रष्टाचाराची तक्रार का करतो, याचा जाब विचारत गैरकायद्याची मंडळी जमवून एका ५६ वर्षीय व्यक्तीला स्पिंकलरचा पाईप आणि काठीने बेदम मारहाण केल्याची संतापजनक घटना धाराशिव तालुक्यातील वाघोली येथे घडली आहे. या मारहाणीत फिर्यादीची दुचाकीही फोडण्यात आली असून, त्यांना जीवे मारण्याची धमकी देण्यात आली आहे. याप्रकरणी धाराशिव ग्रामीण पोलीस ठाण्यात ६ जणांविरुद्ध गुन्हा दाखल करण्यात आला आहे.
अनिल हरिबा धुमाळ (वय ५६, रा. वाघोली, ता. जि. धाराशिव) असे मारहाण झालेल्या फिर्यादीचे नाव आहे.
पोलिसांनी दिलेल्या माहितीनुसार, ही घटना २ मार्च २०२६ रोजी सकाळी १०.४५ वाजेच्या सुमारास वाघोली ते सांजा रोडवर घडली. अनिल धुमाळ यांनी ग्रामपंचायतीच्या कारभारातील भ्रष्टाचाराबाबत तक्रारी केल्या होत्या. याचा राग मनात धरून आरोपींनी एकत्र येत धुमाळ यांना गाठले. “तू भ्रष्टाचाराच्या तक्रारी का करतोस?” असे म्हणत आरोपींनी त्यांना शिवीगाळ करण्यास सुरुवात केली.
त्यानंतर आरोपींनी लाथाबुक्क्यांनी, तसेच स्पिंकलरचा पाईप आणि काठीने धुमाळ यांना बेदम मारहाण करून जखमी केले. एवढ्यावरच न थांबता, आरोपींनी त्यांच्या मोटरसायकलवर दगड फेकून गाडीचे मोठे नुकसान केले आणि जाताना त्यांना जीवे ठार मारण्याची धमकी दिली.
यांच्यावर झाला गुन्हा दाखल:
याप्रकरणी अनिल धुमाळ यांनी मंगळवारी (दि. १० मार्च) धाराशिव ग्रामीण पोलीस ठाण्यात फिर्याद दिली. या तक्रारीवरून खालील ६ आरोपींवर गुन्हा दाखल करण्यात आला आहे:
-
अमरचंद नानासाहेब खडके
-
रोहित बालाजी मगर
-
मनोज घमाजी शेंडगे
-
अर्जुन बब्रुवान खडके
-
प्रदीप बब्रुवान खडके
-
सुलभा संजय खडके
(सर्व रा. वाघोली, ता. जि. धाराशिव)
या प्रथम खबरीवरून धाराशिव ग्रामीण पोलिसांनी सर्व आरोपींविरुद्ध भारतीय न्याय संहितेच्या (BNS) कलम ११८(१), ११५(२), ३५२, ३५१(२)(३), १८९(२), १९१(१), १९०, ३२४(४)(५) आणि १२६(२) अन्वये गुन्हा नोंदवला आहे. या प्रकरणाचा पुढील तपास पोलीस करत आहेत.
