येरमाळा : अवैध कत्तल केलेले तब्बल २० किलो गोवंशीय जनावराचे मांस आणि एका कारसह २ लाख १ हजार ७५० रुपयांचा मुद्देमाल येरमाळा पोलिसांनी कारवाई करत जप्त केला आहे. ही कारवाई १४ मार्च रोजी दुधाळवाडी पाटीजवळ करण्यात आली. याप्रकरणी भूम येथील एका तरुणावर येरमाळा पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, सुलतान अलिशेर कुरेशी (वय २४, रा. गराडा गल्ली, भूम, जि. धाराशिव) असे याप्रकरणी गुन्हा दाखल झालेल्या आरोपीचे नाव आहे. येरमाळा शिवारातील दुधाळवाडी पाटीजवळ मोबीन अजिज मुलानी यांच्या घराजवळ १४ मार्च रोजी सकाळी साडेदहा वाजेच्या सुमारास पोलिसांनी छापा टाकला. यावेळी आरोपी सुलतान कुरेशी याच्याकडे अवैध कत्तल केलेल्या गोवंशीय जनावराचे २० किलो मांस, एक लोखंडी तराजू आणि गुन्ह्यात वापरलेली मारुती सुझुकी कार (क्र. MH 46 A.D. 1892) असा एकूण २ लाख १ हजार ७५० रुपये किमतीचा मुद्देमाल पोलिसांना आढळून आला.
पोलिसांनी हा सर्व मुद्देमाल तात्काळ जप्त केला आहे. या प्रकरणी सरकारतर्फे दिलेल्या फिर्यादीवरून आरोपी सुलतान कुरेशी याच्याविरुद्ध महाराष्ट्र पशुसंरक्षण अधिनियम कलम ५(क), ५(ड) आणि ९ अन्वये येरमाळा पोलीस ठाण्यात गुन्हा नोंदवण्यात आला आहे. या घटनेचा पुढील तपास येरमाळा पोलीस करत आहेत.
