ढोकी : ‘मला वारंवार शिवीगाळ का करता?’ अशी विचारणा केल्याच्या रागातून एका २६ वर्षीय तरुणावर तलवारीने वार करून त्याला गंभीर जखमी केल्याची धक्कादायक घटना कोळेवाडी (ता. धाराशिव) येथे घडली. या प्रकरणी ढोकी पोलीस ठाण्यात चौघांविरुद्ध गुन्हा दाखल करण्यात आला आहे.
सुरज दादासाहेब अकोसकर (वय २६, मूळ रा. कोळेवाडी, सध्या ह.मु. समता नगर, देशमुख हॉस्पिटलजवळ, धाराशिव) असे या हल्ल्यात गंभीर जखमी झालेल्या तरुणाचे नाव आहे. या प्रकरणी त्याने दिलेल्या फिर्यादीवरून आकाश मदन खोत, सुरेकांत सत्यनारायण खोत, अनिल सोमनाथ अकोसकर आणि सुदर्शन सोमनाथ अकोसकर (सर्व रा. कोळेवाडी, ता. जि. धाराशिव) यांच्यावर गुन्हा नोंदवण्यात आला आहे.
पोलिसांनी दिलेल्या माहितीनुसार, शुक्रवारी (ता. १३) सकाळी साडेसहा वाजण्याच्या सुमारास कोळेवाडी गावातील महादेव मंदिरासमोरील रस्त्यावर ही घटना घडली. आरोपी वारंवार शिवीगाळ करत असल्याने सुरजने त्यांना ‘तुम्ही मला शिवीगाळ का करता?’ असे विचारले. या साध्या विचारणेचा राग आल्याने चारही आरोपींनी संगनमत करून सुरजला अश्लील शिवीगाळ करण्यास सुरुवात केली. तसेच, लाथाबुक्क्यांनी मारहाण करत त्याच्यावर थेट तलवारीने हल्ला करून त्याला गंभीर जखमी केले.
या जीवघेण्या हल्ल्यानंतर जखमी सुरज अकोसकर याने सोमवारी (ता. १६) ढोकी पोलीस ठाण्यात जाऊन फिर्याद दिली. या फिर्यादीवरून पोलिसांनी चारही आरोपींविरुद्ध भारतीय न्याय संहिता (BNS) कलम ११८(२), ११५(२), ३५२, ३(५) अन्वये गुन्हा दाखल केला आहे. या प्रकरणाचा अधिक तपास ढोकी पोलीस करत आहेत.
