परंडा : शेताकडे पायी जात असलेल्या एका ६३ वर्षीय ज्येष्ठ महिलेचे तोंड दाबून तसेच चाकू आणि दगडाचा धाक दाखवून भरदिवसा लुटल्याची धक्कादायक घटना परंडा तालुक्यातील सोनगिरी शिवारात घडली. याप्रकरणी तीन अज्ञात दुचाकीस्वारांवर परंडा पोलीस ठाण्यात गुन्हा दाखल करण्यात आला आहे.
प्रमिला भगवान आगरकर (वय ६३, रा. आगरकर गल्ली, परंडा, जि. धाराशिव) असे लुटण्यात आलेल्या ज्येष्ठ महिलेचे नाव आहे. पोलिसांनी दिलेल्या माहितीनुसार, सोमवारी (ता. १६) सकाळी अकरा वाजण्याच्या सुमारास प्रमिला आगरकर या सोनगिरी शिवारातील कृषी विभागाच्या हद्दीतून आपल्या शेताकडे पायी चालत जात होत्या.
यावेळी अचानक एका मोटारसायकलवरून तीन अनोळखी इसम त्यांच्याजवळ आले. या तिघांनी प्रमिला यांना अडवले आणि आरडाओरडा करू नये म्हणून त्यांचे तोंड दाबले. त्यानंतर आरोपींनी त्यांना दगडाने आणि चाकूने मारण्याची धमकी दिली. जिवाच्या भीतीने घाबरलेल्या प्रमिला यांच्या गळ्यातील सोन्याचे मणी असलेले मंगळसूत्र आणि कानातील फुले असा एकूण आठ ग्रॅम वजनाचा आणि १६ हजार रुपये किमतीचा ऐवज या चोरट्यांनी बळजबरीने हिसकावून नेला आणि तेथून पोबारा केला.
हा धक्कादायक प्रकार घडल्यानंतर प्रमिला आगरकर यांनी परंडा पोलीस ठाणे गाठून फिर्याद दिली. त्यांच्या प्रथम खबरीवरून परंडा पोलिसांनी सोमवारी (ता. १६) तीन अज्ञात चोरट्यांविरुद्ध भारतीय न्याय संहिता (BNS) कलम ३०९(४), ३(५) अन्वये जबरी चोरीचा गुन्हा नोंदवला आहे. भरदिवसा घडलेल्या या घटनेमुळे परंडा परिसरात भितीचे वातावरण निर्माण झाले असून, पोलीस या लुटारूंचा कसून शोध घेत आहेत.
