परंडा: जमिनीच्या जुन्या वादातून एका ३५ वर्षीय तरुणाला शिवीगाळ करत पीव्हीसी पाईप आणि काठीने बेदम मारहाण केल्याची घटना परंडा तालुक्यातील बावची शिवार येथे घडली. याप्रकरणी बुधवारी (ता. १८) परंडा पोलीस ठाण्यात चौघांवर गुन्हा दाखल करण्यात आला आहे.
किरण मारुती खवले (वय ३५, रा. बोडका, ता. परंडा, जि. धाराशिव) असे या मारहाणीत जखमी झालेल्या फिर्यादीचे नाव आहे.
पोलिसांनी दिलेल्या माहितीनुसार, बुधवारी (ता. १८) सकाळी साडेदहा वाजेच्या सुमारास किरण खवले हे बावची शिवार येथे होते. त्यावेळी त्यांचा आरोपींसोबत जमिनीच्या कारणावरून वाद उफाळून आला. या वादातून संतापलेल्या आरोपींनी किरण यांना शिवीगाळ करण्यास सुरुवात केली. त्यानंतर त्यांना लाथाबुक्क्यांनी, पीव्हीसी पाईप आणि काठीने बेदम मारहाण करून जखमी केले. तसेच, यापुढे जिवे ठार मारण्याची धमकीही दिली.
या घटनेनंतर किरण खवले यांनी दिलेल्या प्रथम खबरेवरून (फिर्याद) परंडा पोलीस ठाण्यात सौरभ शंकर गायकवाड, संकेत नाना खराडे, रोहित तानाजी गायकवाड आणि जालिंदर गायकवाड (सर्व रा. बावची, ता. परंडा) या चार जणांविरुद्ध भारतीय न्याय संहिता (BNS) कलम १२६(२), ११८(२), ११८(१), ११५(२), ३५२, ३५१(३) आणि ३(५) अन्वये गुन्हा नोंदवण्यात आला आहे. या प्रकरणाचा पुढील तपास परंडा पोलीस करत आहेत.
