वाशी : दारू पिऊन आल्यानंतर झालेल्या वादातून स्वतःच्या जन्मदात्या पित्याला आणि सख्ख्या भावाला शिवीगाळ करत लोखंडी रॉडने बेदम मारहाण केल्याची धक्कादायक घटना भूम तालुक्यातील ईट येथे घडली आहे. या अमानुष मारहाणीत दोघेही गंभीर जखमी झाले असून, या प्रकरणी वाशी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, याप्रकरणी विजय अंगद वेदपाठक (वय ३१, रा. ईट, ता. भूम, जि. धाराशिव) यांनी वाशी पोलिसांत फिर्याद दिली आहे. शनिवारी (ता. ४ एप्रिल) दुपारी १२ वाजेच्या सुमारास फिर्यादी यांचा भाऊ, आरोपी अक्षय अंगद वेदपाठक (रा. ईट) हा दारू पिऊन घरी आला होता. दारूच्या नशेत त्याने फिर्यादी विजय आणि त्यांच्या वडिलांना अकारण शिवीगाळ करण्यास सुरुवात केली.
या दरम्यान वाद वाढल्याने संतापाच्या भरात आरोपी अक्षय याने लाथाबुक्क्यांनी तसेच जवळील लोखंडी रॉडने वडील व भावाला बेदम मारहाण केली. या मारहाणीत ते दोघेही गंभीर जखमी झाले आहेत. एवढ्यावरच न थांबता आरोपीने त्यांना जीवे मारण्याची धमकीही दिली.
घरामध्येच घडलेल्या या रक्तरंजित प्रकारानंतर जखमी विजय वेदपाठक यांनी वाशी पोलीस ठाण्यात जाऊन रीतसर तक्रार नोंदवली. त्यांच्या प्रथम खबरीवरून वाशी पोलिसांनी आरोपी अक्षय वेदपाठक याच्याविरुद्ध नवीन फौजदारी कायदा म्हणजेच भारतीय न्याय संहिता (BNS) कलम ११८(२), ११८(१), ११५(२), ३५१(२)(३) आणि ३५२ अन्वये गुन्हा दाखल केला आहे. या प्रकरणाचा पुढील तपास वाशी पोलीस करत आहेत.
