नळदुर्ग : चारा आणि पाण्याची कोणतीही सोय न करता, एका पिकअप वाहनातून तब्बल १० घोड्यांची (खेचरांची) अत्यंत क्रूरपणे आणि बेकायदेशीररीत्या वाहतूक केली जात असल्याचा प्रकार अणदूर येथे उघडकीस आला आहे. या प्रकरणी नळदुर्ग पोलिसांनी धडक कारवाई करत आंध्र प्रदेशातील एका चालकाविरुद्ध गुन्हा दाखल केला आहे.
भाशाखॉजा शेख (वय २२, रा. येमीनेनीवरपालक, ता. चेरुकुपाल्ली, अरुबांका, जि. गुंटूर, राज्य आंध्र प्रदेश) असे गुन्हा दाखल झालेल्या आरोपीचे नाव आहे.
पोलीस सूत्रांनी दिलेल्या माहितीनुसार, सोमवारी (दि. ६) रात्री ११.२० वाजेच्या सुमारास अणदूर येथील बसस्थानकासमोरील पुलाखाली नळदुर्ग पोलीस गस्त घालत होते. यावेळी त्यांना एक पिकअप वाहन (क्र. एपी ३९ डबल्युएच ३४४०) संशयास्पद स्थितीत आढळून आले. पोलिसांनी या वाहनाची तपासणी केली असता, त्यामध्ये तब्बल दीड लाख रुपये किमतीचे १० घोडे (खेचर) अत्यंत दाटीवाटीने आणि क्रूरपणे कोंबून भरलेले होते.
या मुक्या प्राण्यांच्या वाहतुकीदरम्यान त्यांच्यासाठी चारा किंवा पाण्याची कोणतीही व्यवस्था करण्यात आली नव्हती. ही निर्दयी आणि बेकायदेशीर वाहतूक नळदुर्ग पोलिसांच्या निदर्शनास आल्यानंतर त्यांनी तात्काळ वाहन जप्त करून कारवाई केली.
याप्रकरणी नळदुर्ग पोलिसांनी सरकारतर्फे स्वतः फिर्याद दिली आहे. यावरून आरोपी भाशाखॉजा शेख याच्याविरुद्ध प्राण्यांना क्रूरतेने वागविण्यास प्रतिबंध करणाऱ्या अधिनियमाचे कलम ११(१), तसेच मोटार वाहन कायदा (मोवाका) कलम १७७ आणि महाराष्ट्र मोटार वाहन अधिनियम कलम ८३ अन्वये नळदुर्ग पोलीस ठाण्यात गुन्हा नोंदवण्यात आला आहे. मुक्या प्राण्यांच्या अशा अमानुष वाहतुकीमुळे परिसरात संताप व्यक्त केला जात असून, पोलीस या प्रकरणाचा पुढील तपास करत आहेत.
