धाराशिव : धाराशिव नगर पालिकेतील राजकीय घडामोडींना अखेर वेग आला असून उपनगराध्यक्ष अक्षय ढोबळे यांचा राजीनामा मंजूर करण्यात आला आहे. आमदार राणाजगजितसिंह पाटील यांच्या नेतृत्वाखालील भाजपच्या सत्तेत उपनगराध्यक्षपद दर सहा महिन्यांनी बदलण्याचा अलिखित करार झाला होता. मात्र, आठ महिने उलटूनही ढोबळे यांचा राजीनामा घेतला न गेल्याने पक्षांतर्गत तीव्र नाराजी व धुसफूस सुरू होती. अखेर ढोबळे यांनी आपल्या पदाचा राजीनामा दिला असून, नगराध्यक्षा नेहा काकडे यांनी तो मंजूर करत पुढील कार्यवाहीसाठी जिल्हाधिकाऱ्यांकडे पाठवला आहे.
पदवीधर निवडणुकीनंतरच नवी निवड
मराठवाडा पदवीधर मतदारसंघाच्या निवडणुकीच्या आचारसंहितेमुळे नव्या उपनगराध्यक्षांची निवड तूर्तास लांबणीवर पडली आहे. ही निवडणूक प्रक्रिया पूर्ण झाल्यानंतर नोव्हेंबर महिन्यात नवीन उपनगराध्यक्ष निवडीची शक्यता वर्तवली जात आहे. जिल्हाधिकारी या निवडीचा अधिकृत कार्यक्रम कधी जाहीर करतात, याकडे सर्वांच्या नजरा लागल्या आहेत.
नगराध्यक्षा भूषवणार पीठासीन अधिकारीपद
पूर्वी उपनगराध्यक्ष निवडीच्या प्रक्रियेत उपजिल्हाधिकारी किंवा तहसीलदार हे पीठासीन अधिकारी म्हणून काम पाहत असत. मात्र, नियमातील बदलानुसार आता थेट जनतेतून निवडून आलेल्या नगराध्यक्षा नेहा काकडे याच या निवड प्रक्रियेच्या पीठासीन अधिकारी असतील.
अमित शिंदे यांचे नाव आघाडीवर
रिक्त झालेल्या उपनगराध्यक्षपदासाठी सध्या राजकीय वर्तुळात अमित शिंदे यांचे नाव सर्वाधिक आघाडीवर आहे. पक्षश्रेष्ठी शिंदे यांच्या नावावर शिक्कामोर्तब करून त्यांना संधी देणार, की ऐनवेळी धक्कातंत्राचा वापर करत नवा चेहरा समोर आणणार, यावर आता धाराशिव पालिकेतील पुढील राजकीय समीकरणे अवलंबून आहेत.
