धाराशिव: शेतमालकाने केलेल्या सततच्या जातीवाचक शिवीगाळ, मारहाण आणि मानसिक छळाला कंटाळून एका २३ वर्षीय दलित तरुणाने गळफास घेऊन आत्महत्या केल्याची हृदयद्रावक घटना धाराशिव तालुक्यातील उपळे (माकडाचे) येथे घडली आहे. प्रमोद मनोज अवधुते असे मृत तरुणाचे नाव असून, याप्रकरणी आनंदनगर पोलिसांनी शेतमालकावर गुन्हा दाखल केला आहे.
मिळालेल्या माहितीनुसार, मृत प्रमोद अवधुते हा मागील १० महिन्यांपासून गावातीलच शेतमालक महेश पडवळ याच्या द्राक्ष बागेत मजुरीचे काम करत होता. प्रमोदचे वडील आजारी असल्याने तो गेल्या चार दिवसांपासून कामावर जाऊ शकला नव्हता. याच कारणावरून चिडलेला शेतमालक महेश पडवळ ११ एप्रिल रोजी रात्री प्रमोदच्या घरी गेला. तिथे त्याने “तू कामावर का येत नाहीस?” असे म्हणून जातीवाचक शिवीगाळ केली आणि त्याला बळजबरीने स्वतःसोबत शेतात घेऊन गेला.
वडील आजारी असल्याचे सांगूनही शेतमालकाने प्रमोदला कामावर नेले आणि तिथेही त्याला मारहाण व अपमानित केल्याचे तक्रारीत म्हटले आहे. या सततच्या त्रासाला कंटाळून प्रमोदने १२ एप्रिल रोजी सकाळी ६ वाजेच्या सुमारास शेतमालकाच्याच शेतातील लिंबाच्या झाडाला गळफास लावून आपली जीवनयात्रा संपवली.
याप्रकरणी मृत प्रमोदचे वडील मनोज नाना अवधुते यांनी दिलेल्या फिर्यादीवरून आनंदनगर पोलीस ठाण्यात गुन्हा नोंदवण्यात आला आहे. पोलिसांनी आरोपी महेश पडवळ याच्यावर खालील कलमान्वये गुन्हा दाखल केला आहे:
-
भारतीय न्याय संहिता (BNS): कलम १०८ (आत्महत्येस प्रवृत्त करणे), ११५(२), ३५२.
-
ॲट्रॉसिटी कायदा: अनुसूचित जाती आणि अनुसूचित जमाती (अत्याचार प्रतिबंधक) अधिनियम १९८९ चे कलम ३(१)(r) आणि ३(१)(s).
या घटनेमुळे परिसरात संताप व्यक्त केला जात असून, पोलीस पुढील तपास करत आहेत.
