धाराशिव : जिल्ह्यात चोरीच्या दोन वेगवेगळ्या घटना उघडकीस आल्या असून, धाराशिवजवळील राघुचीवाडी येथे अज्ञात चोरट्यांनी बंद घराचे कुलूप तोडून ६३ हजारांचा ऐवज लांबवला आहे. तर दुसऱ्या घटनेत परंडा तालुक्यातील डोमगाव (सिना कोळेगाव धरण) येथून मोटारीचे स्टार्टर आणि इतर साहित्य चोरीला गेले आहे. या दोन्ही प्रकरणी रविवारी (ता. १७) संबंधित पोलिस ठाण्यांत गुन्हे दाखल करण्यात आले आहेत.
राघुचीवाडीत ६३ हजारांची घरफोडी
पहिल्या घटनेत गौतम भगवान गेजगे (वय ३५, रा. राघुचीवाडी, जि. धाराशिव) यांनी धाराशिव शहर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, गेजगे यांच्या घराच्या मुख्य दरवाजाचे कुलूप अज्ञात चोरट्यांनी शनिवारी (ता. १६) रात्री साडेसात ते रविवारी (ता. १७) सकाळी सहा वाजेच्या दरम्यान तोडले. घरात प्रवेश करून चोरट्यांनी ५ ग्रॅम वजनाचे सोन्याचे दागिने आणि ५० हजार रुपये रोख रक्कम असा एकूण ६३ हजार रुपयांचा मुद्देमाल चोरून नेला. या प्रकरणी रविवारी दिलेल्या प्रथम खबरीवरून धाराशिव शहर पोलिसांत अज्ञात व्यक्तीविरुद्ध भारतीय न्याय संहिता (भा.न्या.सं.) कलम ३३१(३), ३३१(४) आणि ३०५(अ) अन्वये गुन्हा नोंदवण्यात आला आहे.
डोमगाव येथे मोटारीचे स्टार्टर पळवले
दुसऱ्या घटनेत, परंडा तालुक्यातील सिना कोळेगाव धरण (डोमगाव) येथून शेतीसाठी वापरल्या जाणाऱ्या मोटारीचे २१ हजार रुपयांचे साहित्य चोरीला गेले आहे. या प्रकरणी औदुंबर बळीराम गोडगे (वय ६१, रा. रोसा, ता. परंडा) यांनी परंडा पोलिस ठाण्यात फिर्याद दिली आहे. शनिवारी (ता. १६) रात्री पावणेअकरा वाजेच्या सुमारास आरोपी शहाजी तात्या कांबळे (रा. आवटी, ता. करमाळा, जि. सोलापूर) आणि त्याच्या इतर दोन अनोळखी साथीदारांनी मिळून एलटी एके (LT-AK) व एलटीएलके (LTLK) कंपनीचा मोटार स्टार्टर आणि ऑटो असा एकूण २१ हजार रुपयांचा माल चोरून नेला. औदुंबर गोडगे यांनी रविवारी दिलेल्या फिर्यादीवरून परंडा पोलिस ठाण्यात संशयित आरोपींविरुद्ध भा.न्या.सं. कलम ३०३(२), ३१७(२) आणि ३(५) नुसार गुन्हा दाखल करण्यात आला आहे. पुढील तपास परंडा पोलिस करत आहेत.
