परंडा: परंडा शहरातील कृषी उत्पन्न बाजार समितीच्या गेटसमोरील रोडवर लोकांच्या जीवितास धोका निर्माण होईल अशा पद्धतीने विनापरवाना व बेकायदेशीररित्या घातक चाकू बाळगून फिरणाऱ्या दोन तरुणांना परंडा पोलिसांनी रंगेहात पकडले आहे. पोलिसांनी त्यांच्याकडचे शस्त्र जप्त केले असून, दोन्ही तरुणांविरुद्ध शस्त्र कायदा आणि महाराष्ट्र पोलीस अधिनियमांतर्गत गंभीर कलमांखाली गुन्हा दाखल केला आहे.
याप्रकरणी पोलिसांनी दिलेल्या माहितीनुसार, फैय्यज पठाण आणि आयाज पठाण (दोन्ही रा. मोमीन गल्ली, परंडा, ता. परंडा, जि. धाराशिव) अशी अटक करण्यात आलेल्या संशयित आरोपींची नावे आहेत.
भरदिवसा बाजार समिती परिसरात कारवाई
परंडा पोलीस ठाण्याचे पथक गुरुवार, दि. २८ मे रोजी दुपारी हद्दीत कायदा व सुव्यवस्था राखण्यासाठी पेट्रोलिंग करत होते. दुपारी १२ वाजेच्या सुमारास कृषी उत्पन्न बाजार समिती गेटसमोरील रोडवर दोन तरुण संशयास्पद रितीने वावरत असल्याची माहिती पोलिसांना मिळाली. त्यानुसार पथकाने तातडीने तिथे धाव घेतली.
सार्वजनिक शांतता भंग करण्याचा प्रयत्न
पोलिसांनी संशयावरून फैय्यज आणि आयाज या दोघांना ताब्यात घेऊन त्यांची जागेवरच झडती घेतली. यावेळी त्यांच्याकडे एक धारदार चाकू मिळून आला. सार्वजनिक ठिकाणी, त्यातही गजबजलेल्या बाजार समिती परिसरात अशा प्रकारचे घातक शस्त्र बाळगून ते लोकांच्या जीवितास धोका निर्माण होईल अशा अविर्भावात वावरत होते. या शस्त्राबाबत त्यांच्याकडे कोणताही अधिकृत परवाना नव्हता. पोलिसांनी तात्काळ ते घातक शस्त्र जप्त करून दोघांनाही बेड्या ठोकल्या.
विविध कलमांखाली गुन्हा नोंद
या धडक कारवाईनंतर परंडा पोलीस ठाण्याचे पोलीस उपनिरीक्षक (PSI) सूर्यजीत जगदाळे यांनी दिलेल्या प्रथम खबरीवरून (FIR) आरोपी फैय्यज पठाण आणि आयाज पठाण यांच्याविरुद्ध भारतीय न्याय संहिता (BNS) कलम ४९ सह ‘शस्त्र कायदा’ (Arms Act) कलम ४, २५ आणि ‘महाराष्ट्र पोलीस अधिनियम’ कलम ११०, १२२, ११७, १३५ अन्वये गुन्हा नोंदवण्यात आला आहे. या प्रकरणाचा पुढील तपास परंडा पोलीस करत आहेत.
