उमरगा: तालुक्यातील व्हंताळ शिवारात जमिनीच्या आणि कौटुंबिक वादातून एका महिलेच्या बंद घराचे कुलूप तोडून ट्रॅक्टरचे महागडे साहित्य चोरून नेल्याची धक्कादायक घटना समोर आली आहे. याप्रकरणी चोरीचा जाब विचारण्यासाठी गेलेल्या महिला फिर्यादी आणि त्यांच्या दिराला आरोपींनी अश्लील शिवीगाळ करत जिवे ठार मारण्याची धमकी दिली. याप्रकरणी उमरगा पोलीस ठाण्यात दोन जणांविरुद्ध गंभीर कलमांखाली गुन्हा दाखल करण्यात आला आहे.
राजाभाऊ श्रीमंत जाधव आणि पृथ्वीराज राजाभाऊ जाधव (दोन्ही रा. व्हंताळ, ता. उमरगा, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी सविता संजयराव जाधव (वय ५०, मूळ रा. व्हंताळ, ह.मु. बाळेखेड, उत्तर सोलापूर) यांनी उमरगा पोलिसांत फिर्याद दिली आहे.
बंद घराचे कडी-कोंडा तोडले
पोलिसांनी दिलेल्या माहितीनुसार, फिर्यादी सविता जाधव यांचे व्हंताळ येथे शेत गट नंबर १७९ मध्ये घर आणि शेड (शेडनेट/शेटर) आहे. गेल्या २१ एप्रिल ते २७ एप्रिल या कालावधीत फिर्यादी गावात नसताना, आरोपींनी संगनमत करून त्यांच्या बंद घराचे आणि शेडचे कडी-कोंडा बेकायदेशीररित्या तोडले. आरोपींनी घराचे नुकसान करत आवारात उभे असलेल्या ट्रॅक्टरचे ‘पंजी’ (Cultivator) आणि ‘रोटावेटर’ असा एकूण ४९ हजार रुपये किमतीचा शेतीचा मौल्यवान माल चोरून नेला.
जाब विचारताच दिला जिवे मारण्याचा दम
दरम्यान, हा चोरीचा प्रकार समोर आल्यानंतर फिर्यादी सविता जाधव आणि त्यांचे दीर आरोपींना विचारणा करण्यासाठी शेतात गेले होते. त्यावेळी आरोपींनी जुन्या वादाची कुरापत काढून दोघांनाही अत्यंत अश्लील भाषेत शिवीगाळ केली. तसेच लाथाबुक्क्यांनी मारहाण करण्याचा प्रयत्न करत, “जर पुन्हा इथे आलात, तर तुम्हा दोघांना जिवंत सोडणार नाही,” अशी थेट जिवे ठार मारण्याची धमकी दिली.
उमरगा पोलिसांत गुन्हा दाखल
या त्रासाला कंटाळून अखेर पीडित महिला सविता जाधव यांनी गुरुवार, दि. २८ मे रोजी उमरगा पोलीस ठाणे गाठून तक्रार दिली. त्यांच्या प्रथम खबरीवरून आरोपी राजाभाऊ जाधव आणि पृथ्वीराज जाधव यांच्याविरुद्ध भारतीय न्याय संहिता (BNS) कलम ३०३(२), ३२४(४), ३५२, ३५१(२), ३५१(३) आणि ३(५) अन्वये घरफोडी, चोरी आणि धमकीचा गुन्हा दाखल करण्यात आला आहे. उमरगा पोलीस या प्रकरणाचा पुढील तपास करत आहेत.
