येरमाळा / वाशी: वाशी तालुक्यातील बावी शिवारात शेतजमिनीच्या मशागतीवरून जुन्या वादाची कुरापत काढून एका ७५ वर्षीय वृद्ध शेतकऱ्यासह त्यांच्या कुटुंबाला काठी आणि लाथाबुक्क्यांनी बेदम मारहाण केल्याची धक्कादायक घटना समोर आली आहे. या हिंसक हल्ल्यात वृद्ध शेतकरी, त्यांचा पुतण्या आणि भावजय गंभीर जखमी झाले आहेत. याप्रकरणी येरमाळा पोलीस ठाण्यात एका मुख्य संशयितासह त्याच्या तीन अनोळखी नातेवाईकांवर गंभीर कलमांखाली गुन्हा दाखल करण्यात आला आहे.
उत्रेश्वर गोरख कवडे आणि त्याच्यासोबत आलेले इटकूर येथील तीन अनोळखी नातेवाईक (सर्व रा. जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी वृद्ध शेतकरी ज्ञानदेव सुखदेव शिंदे (वय ७५, रा. बावी, ता. वाशी) यांनी येरमाळा पोलिसांत फिर्याद दिली आहे.
शेत गट नंबर ६४९ मधील वाद
पोलिसांनी दिलेल्या माहितीनुसार, फिर्यादी ज्ञानदेव शिंदे आणि आरोपी उत्रेश्वर कवडे यांच्यात शेतजमिनीच्या मशागतीवरून वाद सुरू आहे. गेल्या गुरुवारी (दि. २१ मे) सकाळी साडेपाच वाजेच्या सुमारास ज्ञानदेव शिंदे, त्यांचा पुतण्या विजयसिंह शिंदे आणि भावजय सुकन्या हे बावी शिवारातील शेत गट नंबर ६४९ मध्ये काम करत होते.
काठीने बेदम मारहाण अन् जिवे मारण्याची धमकी
त्याच वेळी आरोपी उत्रेश्वर कवडे हा इटकूर येथील आपल्या तीन अनोळखी नातेवाईकांना सोबत घेऊन तिथे आला. “तुम्ही इथे शेतीची मशागत का करता?” असे म्हणत आरोपींनी ज्ञानदेव शिंदे आणि त्यांच्या कुटुंबीयांना अश्लील शिवीगाळ करण्यास सुरुवात केली. वाद वाढल्याने आरोपींनी हातातील काठीने आणि लाथाबुक्क्यांनी विजयसिंह, सुकन्या आणि वृद्ध ज्ञानदेव यांना बेदम मारहाण करण्यास सुरुवात केली. या हल्ल्यात तिघेही गंभीर जखमी झाले असून, “जर पुन्हा शेतात पाऊल ठेवले तर जिवंत सोडणार नाही,” अशी धमकी देत आरोपींनी तिथून पळ काढला.
येरमाळा पोलिसांत गुन्हा दाखल
या घटनेनंतर जखमींवर रुग्णालयात उपचार करण्यात आले. त्यानंतर फिर्यादी ज्ञानदेव शिंदे यांनी गुरुवार, दि. २८ मे रोजी येरमाळा पोलीस ठाणे गाठून रीतसर तक्रार दिली. त्यांच्या प्रथम खबरीवरून आरोपी उत्रेश्वर कवडे आणि इतर ३ अनोळखी व्यक्तींविरुद्ध भारतीय न्याय संहिता (BNS) कलम ११७(२), ११८(१), ११५(२), ३५२, ३५१(२) आणि ३(५) अन्वये गुन्हा दाखल करण्यात आला आहे. पोलीस या प्रकरणाचा पुढील तपास करत आहेत.
