कळंब – तालुक्यातील भाटशिरपुरा येथे शेतजमिनीच्या कारणावरून दोन गटांत तुंबळ हाणामारी झाल्याची धक्कादायक घटना समोर आली आहे. आरोपींनी बेकायदेशीर जमाव जमवून एकाच कुटुंबातील सदस्यांवर धारदार शस्त्र, काठ्या आणि दगडाने जीवघेणा हल्ला केला. या रक्तरंजित संघर्षात पती, पत्नी आणि त्यांची दोन मुले गंभीर जखमी झाली असून, हल्लेखोरांनी तरुणाच्या हातातील सोन्याची अंगठी देखील बळजबरीने काढून घेतली. याप्रकरणी शिराढोण पोलीस ठाण्यात महिलांसह सात जणांविरुद्ध गंभीर कलमांखाली गुन्हा दाखल करण्यात आला आहे.
नेताजी शिवाजी वाघमारे, तानाजी शिवाजी वाघमारे, गणेश तानाजी वाघमारे, रविराज नेताजी वाघमारे, प्रेमराज नेताजी वाघमारे, भाग्यश्री नेताजी वाघमारे आणि गंगाबाई तानाजी वाघमारे (सर्व रा. भाटशिरपुरा, ता. कळंब, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी दिलीप नामदेव वाघमारे (वय ५१, रा. भाटशिरपुरा) यांनी शिराढोण पोलिसांत फिर्याद दिली आहे.
धारदार शस्त्र आणि दगडांनी केला हल्ला
पोलिसांनी दिलेल्या माहितीनुसार, फिर्यादी दिलीप वाघमारे आणि आरोपींमध्ये शेतजमिनीवरून जुना वाद सुरू आहे. बुधवार, दि. २७ मे रोजी दुपारी साडेतीन वाजेच्या सुमारास भाटशिरपुरा शिवारात याच वादाची कुरापत काढून आरोपींनी बेकायदेशीररीत्या जमाव जमवला. आरोपींनी दिलीप वाघमारे, त्यांची पत्नी सुनीता, मुले सुहास आणि श्रीनिवास यांना रस्त्यात गाठून अश्लील शिवीगाळ करण्यास सुरुवात केली.
वाद वाढल्यानंतर आरोपींनी सोबत आणलेल्या धारदार शस्त्राने, काठ्यांनी आणि रस्त्यावरील दगडांनी या संपूर्ण कुटुंबावर हल्ला चढवला. या अचानक झालेल्या हल्ल्यात वाघमारे कुटुंबातील चौघेही रक्तबंबाळ होऊन गंभीर जखमी झाले.
मारहाण करत सोन्याची अंगठी हिसकावली
हाणामारी सुरू असताना आरोपींनी दिलीप वाघमारे यांचा मुलगा सुहास याला बेदम मारहाण केली आणि त्याच्या हातातील ५ ग्रॅम वजनाची सोन्याची अंगठी बळजबरीने काढून घेतली. “तुम्हाला आज जिवंत सोडत नाही,” अशी धमकी देत आरोपींनी परिसरात दहशत निर्माण केली. आरडाओरडा झाल्याने परिसरातील नागरिक धावून आले, त्यानंतर आरोपी तिथून निघून गेले. जखमींवर तात्काळ स्थानिक रुग्णालयात उपचार करण्यात आले.
शिराढोण पोलिसांत गुन्हा दाखल
या हिंसक घटनेनंतर फिर्यादी दिलीप वाघमारे यांनी गुरुवार, दि. २८ मे रोजी शिराढोण पोलीस ठाणे गाठून रीतसर तक्रार दिली. त्यांच्या प्रथम खबरीवरून (FIR) आरोपी नेताजी वाघमारे, तानाजी वाघमारे यांच्यासह सात जणांविरुद्ध भारतीय न्याय संहिता (BNS) कलम ११८(१), ११५(२), ३५२, ११९(१), ३५१(२), १८९(२), १९० आणि १९१(२) अन्वये दंगा करणे, घातक शस्त्राने दुखापत करणे आणि चोरीचा गुन्हा दाखल करण्यात आला आहे. शिराढोण पोलीस या प्रकरणाचा पुढील तपास करत आहेत.
