धाराशिव: धाराशिव जिल्हा पोलिसांच्या स्थानिक गुन्हे शाखेने (LCB) घरफोडी आणि चोऱ्यांच्या गुन्ह्यांचा छडा लावत आतापर्यंतची सर्वात मोठी आणि धडाकेबाज कामगिरी केली आहे. जिल्ह्यात धुमाकूळ घालणाऱ्या एका अट्टल घरफोडी करणाऱ्या आरोपीला पोलिसांनी अत्यंत शिताफीने अटक केली आहे. त्याच्याकडून तब्बल ३२ गुन्ह्यांची कबुली मिळाली असून, १८ तोळे सोन्यासह चोरीच्या पैशातून घेतलेली नवीकोरी ‘ब्रेझा’ कार आणि ‘बुलेट’ असा एकूण ४५ लाख ३५ हजार रुपये किमतीचा अवाढव्य मुद्देमाल जप्त करण्यात आला आहे. या मोठ्या कारवाईमुळे जिल्ह्यातील गुन्हेगारी जगतात, विशेषतः घरफोड्या करणाऱ्या टोळ्यांमध्ये प्रचंड खळबळ उडाली आहे.
असा रचला सुंभा शिवारात सापळा…
शनिवार, दि. ३० मे रोजी स्थानिक गुन्हे शाखेचे पोलीस निरीक्षक विनोद ईज्जपवार यांना एका विश्वसनीय खबऱ्याकडून अत्यंत गोपनीय माहिती मिळाली. धाराशिव जिल्ह्यातील अनेक पोलीस ठाण्यांच्या हद्दीत घरफोड्या करणारा मुख्य संशयित आरोपी अजय श्रावण शिंदे हा वाशी तालुक्यातील सुंभा येथे आला असल्याची माहिती मिळाली होती.
माहिती मिळताच पोनि ईज्जपवार यांनी तात्काळ पोलीस अधीक्षक श्रीमती रितू खोखर आणि अपर पोलीस अधीक्षक सचिन पांडकर यांना अवगत केले. वरिष्ठांच्या मार्गदर्शनाखाली एलसीबीची सर्व पथके सुंभा गावाकडे तातडीने रवाना झाली.
पोलिसांना पाहून ठोकली पळवाट, पण…
माहिती मिळालेल्या ठिकाणी एलसीबीचे पथक पोहोचले आणि त्यांनी दबा धरला. पोलिसांची गाडी पाहताच संशयित अजय शिंदे याने तिथून पळ काढण्याचा प्रयत्न केला. मात्र, एलसीबीच्या सतर्क जवानांनी वेढा घालत त्याला आणि त्याच्यासोबत असलेल्या श्रावण जमनाशा शिंदे या दोघांना अत्यंत शिताफीने पाठलाग करून ताब्यात घेतले.
जिल्ह्यातील ‘या’ १० पोलीस ठाण्यांमधील ३२ गुन्हे उघड!
दोघांना ताब्यात घेतल्यानंतर सुरुवातीला त्यांनी पोलिसांना उडवाउडवीची उत्तरे देऊन दिशाभूल करण्याचा प्रयत्न केला. मात्र, पोलीस निरीक्षक विनोद ईज्जपवार यांनी अजय शिंदे याला खाक्या दाखवत अधिक विश्वासात घेऊन कसून चौकशी केली. त्यानंतर त्याने दिलेली कबुली ऐकून पोलीसही चक्रावून गेले.
आरोपी अजय शिंदे याने त्याच्या इतर साथीदारांच्या मदतीने धाराशिव जिल्ह्यातील तब्बल १० पोलीस ठाण्यांच्या हद्दीत घरफोड्या केल्याचे कबूल केले. यामध्ये:
बेंबळी, ढोकी, धाराशिव ग्रामीण, शिराढोण, मुरुम, लोहारा, वाशी, परंडा, येरमाळा आणि आनंदनगर या पोलीस ठाण्यांच्या हद्दीतील एकूण ३२ घरफोड्यांचे गुन्हे उघडकीस आले आहेत.
चोरीच्या पैशातून ‘ब्रेझा’ आणि ‘बुलेट’ची खरेदी!
आरोपीच्या वाट्याला आलेल्या मुद्देमालाची तपासणी केली असता, पोलिसांनी त्याच्याकडून १८ तोळे सोन्याचे दागिने जप्त केले. धक्कादायक बाब म्हणजे, चोरीचे काही सोने विकून आलेल्या पैशातून आरोपीने स्वतःच्या चैनीसाठी एक महागडी ‘महिंद्रा ब्रेझा’ (चारचाकी) आणि एक नवीन ‘रॉयल एनफिल्ड बुलेट’ (दुचाकी) गाडी खरेदी केली असल्याचे सांगितले. पोलिसांनी सोन्याच्या दागिन्यांसह या दोन्ही गाड्या जागीच जप्त केल्या आहेत. या संपूर्ण जप्त मुद्देमालाची किंमत ४५ लाख ३५ हजार रुपये आहे.
‘या’ जाबांज पथकाने बजावली कामगिरी:
ही ऐतिहासिक कामगिरी पोलीस अधीक्षक श्रीमती रितू खोखर, अपर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद ईज्जपवार, सपोनि सचिन खटके, अमोल मोरे, पोलीस अंमलदार विनोद जानराव, शौकत पठाण, दयानंद गादेकर, नितीन जाधवर, बळीराम शिंदे, जावेद काझी, प्रकाश औताडे, समाधान वाघमारे, बबन जाधवर, अमोल चव्हाण, अशोक ढगारे, राहुल नाईकवाडी, अमोल निंबाळकर, राठोड, प्रदीप वाघमारे, पुष्कर मुंगळे, महिला पोलीस कर्मचारी शोभा बांगर, चालक सुभाष चौरे, महेबुब अरब, विनायक दहिहंडे, प्रकाश बोईनवाड, दीपक डोंगरे, बाबा गुरव आणि रोहित दंडनाईक यांच्या संयुक्त पथकाने बजावली आहे.
पुढील तपास: या टोळीत आणखी कोणते साथीदार सामील आहेत आणि त्यांनी आणखी कुठे चोऱ्या केल्या आहेत का, याचा पुढील तपास पोलीस करत आहेत.
