उमरगा: तालुक्यातील तळमोड शिवारात जुन्या भांडणाची कुरापत काढून एका २८ वर्षीय तरुणावर लोखंडी रॉड, काठ्या आणि दगडांनी प्राणघातक हल्ला केल्याची धक्कादायक घटना समोर आली आहे. “आमच्या माणसाला का मारहाण केली?” असा जाब विचारत तिघांनी मिळून या तरुणाला रस्त्यात गाठून रक्तबंबाळ केले. याप्रकरणी उमरगा पोलीस ठाण्यात तीन जणांविरुद्ध गंभीर कलमांखाली गुन्हा दाखल करण्यात आला आहे.
यल्लाप्पा यंपाळे, गुंडप्पा यंपाळे आणि बाबू यंपाळे (सर्व रा. थोरलेवाडी, ता. उमरगा, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी प्रल्हाद अंबादास मिसाले (वय २८, रा. थोरलेवाडी) यांनी उमरगा पोलिसांत फिर्याद दिली आहे.
हॉटेलसमोर अचानक केला हल्ला
पोलिसांनी दिलेल्या माहितीनुसार, फिर्यादी प्रल्हाद मिसाले आणि आरोपींमध्ये गावातीलच बसवराज कोराळे याला झालेल्या मारहाणीवरून वाद सुरू होता. गुरुवार, दि. २८ मे रोजी सायंकाळी साडेपाच वाजेच्या सुमारास प्रल्हाद हे तळमोड येथील धनराज भोसले यांच्या रोड कडेला असलेल्या हॉटेलसमोर थांबले होते.
त्याच वेळी तिथे आलेल्या यंपाळे बंधूंनी प्रल्हाद यांना घेरले. “तुम्ही बसवराज कोराळे याला का मारहाण केली?” असे म्हणत आरोपींनी थेट अश्लील शिवीगाळ करण्यास सुरुवात केली.
लोखंडी रॉड आणि दगडांनी केले वार
वाद वाढत गेल्यानंतर आरोपींनी सोबत आणलेल्या लोखंडी रॉड, काठ्या आणि रस्त्यावरील मोठे दगड हातात घेऊन प्रल्हाद यांच्यावर हल्ला चढवला. आरोपींनी लोखंडी रॉडने आणि दगडांनी प्रल्हाद यांच्या डोक्यावर व शरीरावर बेदम मारहाण केली. या अचानक झालेल्या हल्ल्यात प्रल्हाद मिसाले हे गंभीर जखमी होऊन रक्तबंबाळ झाले. आरडाओरडा झाल्याने परिसरातील नागरिक धावून आले, त्यानंतर आरोपींनी तिथून पळ काढला. जखमी प्रल्हाद यांना तात्काळ उपचारासाठी रुग्णालयात दाखल करण्यात आले.
उमरगा पोलिसांत गुन्हा दाखल
उपचार घेतल्यानंतर फिर्यादी प्रल्हाद मिसाले यांनी रविवार, दि. ३१ मे रोजी उमरगा पोलीस ठाणे गाठून आपबिती सांगितली. त्यांच्या प्रथम खबरीवरून (FIR) आरोपी यल्लाप्पा यंपाळे, गुंडप्पा यंपाळे आणि बाबू यंपाळे या तिघांविरुद्ध भारतीय न्याय संहिता (BNS) कलम ११८(२), ११८(१), ३५२ आणि ३(५) अन्वये घातक शस्त्राने गंभीर दुखापत केल्याप्रकरणी गुन्हा दाखल करण्यात आला आहे. उमरगा पोलीस या प्रकरणाचा पुढील तपास करत आहेत.
