धाराशिव : पूर्वी दाखल असलेली पोलीस केस मागे घेण्याच्या कारणावरून धाराशिव तालुक्यातील घाटंग्री येथील नदीपात्रात दोन गटांत भीषण राडा झाल्याची घटना समोर आली आहे. आरोपींनी बेकायदेशीर जमाव जमवून एका २० वर्षीय तरुणाला रस्त्यात गाठले. त्यानंतर त्याला जातीवाचक शिवीगाळ करत कोयता, तलवार, लोखंडी गॅस पाईप, बेल्ट आणि दगडांनी बेदम मारहाण करून गंभीर जखमी केले. याप्रकरणी धाराशिव ग्रामीण पोलीस ठाण्यात ११ जणांविरुद्ध अॅट्रॉसिटी (अनुसूचित जाती-जमाती अत्याचार प्रतिबंधक कायदा) आणि दंगलीचे गंभीर गुन्हे दाखल करण्यात आले आहेत.
अविनाश अच्युत शिंदे, अण्णा सुनील शिंदे, विकास हराळे, सिद्धनाथ बिचकुले, अजय सतीश हराळे, सुहास पिंटू शिंदे, आदित्य खांडेकर, प्रसाद खांडेकर आणि इतर तीन अनोळखी इसम (सर्व रा. घाटंग्री, ता. जि. धाराशिव) अशी गुन्हा दाखल झालेल्या संशयित हल्लेखोरांची नावे आहेत. या भयंकर हल्ल्यात संकेत विलास कांबळे (वय २०, रा. शेकापूर, ता. जि. धाराशिव) हा तरुण गंभीर जखमी झाला असून, त्याच्या वैद्यकीय जबाबावरून पोलिसांनी ही कारवाई केली आहे.
नदीपात्रात घेरून केला जीवघेणा हल्ला
पोलिसांनी दिलेल्या माहितीनुसार, फिर्यादी संकेत कांबळे आणि आरोपींमध्ये जुन्या प्रकरणावरून न्यायालयात किंवा पोलिसांत केस सुरू आहे. हीच केस मागे घेण्यासाठी आरोपी संकेतवर सतत दबाव टाकत होते. शनिवार, दि. ३० मे रोजी रात्री साडेनऊ वाजेच्या सुमारास संकेत हा घाटंग्री येथील नदीपात्राजवळून जात असताना, आधीच दबा धरून बसलेल्या आरोपींनी त्याला घेरले.
“तू आमच्याविरुद्ध केलेली केस मागे घे,” असे म्हणत आरोपींनी त्याला जाहीरपणे जातीवाचक आणि अश्लील शिवीगाळ करण्यास सुरुवात केली. संकेतने विरोध करण्याचा प्रयत्न केला असता, सर्व आरोपींनी गैरकायद्याची मंडळी जमवून त्याच्यावर हल्ला चढवला.
कोयता, बेल्ट अन् तलवारीने केले वार
हा हल्ला अत्यंत नियोजनबद्ध आणि हिंसक होता. आरोपींनी सोबत आणलेला धारदार कोयता, लोखंडी तलवार, बेल्ट, गॅस पाईप, काठ्या आणि रस्त्यावरील दगडांनी संकेतला बेदम मारहाण केली. या अचानक झालेल्या प्राणघातक हल्ल्यात संकेतच्या डोक्याला आणि शरीरावर गंभीर दुखापती झाल्या असून तो रक्तबंबाळ होऊन खाली कोसळला. “जर केस मागे घेतली नाही, तर तुला जिवंत सोडणार नाही,” अशी धमकी देत आरोपींनी परिसरात दहशत निर्माण केली.
हल्ल्यानंतर जखमी संकेतला तात्काळ रुग्णालयात दाखल करण्यात आले. त्याची प्रकृती गंभीर असल्याने पोलिसांनी रुग्णालयात जाऊन त्याचा वैद्यकीय जबाब नोंदवला.
११ जणांवर ‘अॅट्रॉसिटी’सह विविध कलमांखाली गुन्हे
पीडित संकेत कांबळे याने रुग्णालयात दिलेल्या अधिकृत वैद्यकीय जबाबाच्या आधारे रविवार, दि. ३१ मे रोजी धाराशिव ग्रामीण पोलीस ठाण्यात गुन्हा नोंदवण्यात आला. आरोपींविरुद्ध भारतीय न्याय संहिता (BNS) कलम ११८(१) (घातक शस्त्राने दुखापत करणे), ११५(२), ३५२, ३५१(२)(३), १८९(२) (बेकायदेशीर जमाव जमवणे), १९०, १९१(२)(३) सह ‘अनुसूचित जाती आणि अनुसूचित जमाती अत्याचार प्रतिबंधक कायदा’ (Atrocity Act) कलम ३(१)(s) आणि ३(१)(r) अन्वये गुन्हा दाखल करण्यात आला आहे. पोलीस उपअधीक्षक दर्जाचे अधिकारी या प्रकरणाचा पुढील तपास करत असून आरोपींच्या शोधासाठी पथके रवाना करण्यात आली आहेत.
