कळंब: कळंब शहर आणि तालुक्यात वादविवादातून दोन वेगवेगळ्या ठिकाणी बेकायदेशीर जमाव जमवून मोठ्या प्रमाणावर हाणामारी झाल्याच्या घटना समोर आल्या आहेत. पहिल्या घटनेत एका कौटुंबिक कार्यक्रमात जेवणाच्या कारणावरून तरुणीसह तिच्या नातेवाईकांना बिअरची बाटली, दगड आणि लोखंडी पाईपने बेदम मारहाण करण्यात आली. तर दुसऱ्या घटनेत शेतजमिनीच्या वादातून एका ज्येष्ठ नागरिकासह त्यांच्या कुटुंबावर चाल करून जात मारहाण व धमकावण्यात आले. या दोन्ही प्रकरणांत कळंब पोलीस ठाण्यात एकूण १४ जणांविरुद्ध दंगलीचे गंभीर गुन्हे दाखल करण्यात आले आहेत.
१. पहिली घटना: ‘चपात्या कुठे नेतोस’ म्हणत लग्नाच्या कार्यक्रमात रक्तपात (कळंब शहर)
कळंब पोलिसांनी दिलेल्या माहितीनुसार, बीड जिल्ह्यातील केज तालुक्यातील मांग वडगाव येथील २२ वर्षीय तरुणी हिनाबाई राजेश पवार २६ मे रोजी कळंब येथील कल्पनानगर पारधी पिढी परिसरात एका कार्यक्रमासाठी आली होती. या कार्यक्रमात जेवणाची पंगत सुरू असताना हिनाबाई यांचा दीर रामा लाला पवार हा पाहुण्यांना जेवण वाढत होता.
याच वेळी तिथल्या काही तरुणांनी रामाला अडवले आणि “तू एवढ्या चपात्या कुठे घेऊन चालला आहेस? तुझ्याच पाहुण्यांना का वाढतोस?” असा जाब विचारत वाद घालण्यास सुरुवात केली. हिनाबाई आणि त्यांच्या नातेवाईकांनी हा वाद सोडवण्याचा प्रयत्न केला असता, आरोपींनी गैरकायद्याची मंडळी जमवून थेट हल्ला केला.
बिअरची बाटली आणि लोखंडी पाईपने हल्ला
संशयित आरोपींनी हातामध्ये मिळतील त्या वस्तू घेऊन हिनाबाई आणि त्यांच्या नातेवाईकांवर हल्ला चढवला. आरोपींनी लाथाबुक्क्यांनी मारहाण करत थेट डोक्यात बिअरची बाटली फोडली, तसेच लोखंडी पाईप, काठ्या आणि दगडांनी बेदम मारहाण करून गंभीर जखमी केले.
-
गुन्हा दाखल: याप्रकारणी पीडित हिनाबाई पवार यांनी १ जून रोजी दिलेल्या फिर्यादीवरून आरोपी सूरज तानाजी पवार, बिरू बप्पा पवार, अरुण सुभाष पवार, संत्या शिवराम पवार, कल्लु राजा पवार आणि सुभाष सुरेश पवार (सर्व रा. कल्पना नगर, कळंब) या ६ जणांविरुद्ध भारतीय न्याय संहिता (BNS) कलम ११८(१), ११५(२), १८९(१), १८९(२), १९१(१), १९१(२) आणि १९० अन्वये गुन्हा दाखल केला आहे.
२. दुसरी घटना: कन्हेरवाडी शिवारात शेतजमिनीवरून वाद; ज्येष्ठ नागरिकाला धमकावले (कळंब ग्रामीण)
दुसरी घटना कळंब तालुक्यातील कन्हेरवाडी शिवारातील शेत गट नंबर १६१ मध्ये घडली. रामेश्वर रावण जगताप (वय ६७, रा. कन्हेरवाडी) हे २६ मे रोजी दुपारी दोन वाजेच्या सुमारास त्यांच्या शेतात सून भाग्यश्री आणि जयदीप जगताप यांच्यासह काम करत होते.
यावेळी शेतातील जुन्या वादाची कुरापत काढून गावातीलच एकाच कुटुंबातील ८ जणांनी बेकायदेशीर जमाव जमवून रामेश्वर जगताप यांच्या शेतात घुसखोरी केली. आरोपींनी रामेश्वर यांच्यासह त्यांच्या सुनेला आणि जयदीपला अश्लील शिवीगाळ करण्यास सुरुवात केली.
‘इथून उठवून लावू’ अशी दिली धमकी
विरोध केला असता आरोपींच्या टोळीने रामेश्वर जगताप आणि त्यांच्या कुटुंबाला लाथाबुक्क्यांनी बेदम मारहाण करून जखमी केले. तसेच “तुम्हाला या शेतात राहू देणार नाही, इथून उठवून लावू,” अशी जाहीर धमकी दिली.
-
गुन्हा दाखल: याप्रकरणी ज्येष्ठ नागरिक रामेश्वर जगताप यांनी कळंब पोलीस ठाण्यात धाव घेऊन तक्रार दिली. त्यांच्या फिर्यादीवरून आरोपी रामभाऊ बाबुराव जगताप, शिलाबाई रामभाऊ जगताप, बलभीम नागुराव जगताप, बिभीषण बलभीम जगताप, चंद्रसेन बलभीम जगताप, सुजाता चंद्रसेन जगताप, रोहन बिभीषण जगताप आणि केवळ बिभीषण जगताप (सर्व रा. कन्हेरवाडी, ता. कळंब) या ८ जणांविरुद्ध BNS कलम ३५२, ३५१(२), १८९(१), १८९(२), १९१(१), १९१(२) आणि १९० अन्वये गुन्हा नोंदवला आहे.
कळंब पोलिसांकडून तपास सुरू
दोन्ही घटनांमध्ये आरोपींनी गैरकायद्याचा जमाव जमवून कायदा व सुव्यवस्था हातात घेण्याचा प्रयत्न केला आहे. कळंब पोलीस ठाण्याचे पथक या दोन्ही प्रकरणांचा सखोल तपास करत असून, फरार आरोपींना अटक करण्यासाठी पोलीस कारवाई करत आहेत.
