धाराशिव: शहरात वाहन चोरीच्या गुन्ह्यांना आळा घालण्यासाठी धाराशिव पोलीस दल अॅक्शन मोडमध्ये आले आहे. स्थानिक गुन्हे शाखेच्या (LCB) पोलीस पथकाने गुरुवारी (दि. ४ जून) एका गुप्त माहितीच्या आधारे धडक कारवाई करत, चोरीची मोटरसायकल विकण्याच्या तयारीत असलेल्या एका अट्टल चोरट्याला रंगेहात अटक केली आहे. पोलिसांनी आरोपीकडून २० हजार रुपये किमतीची दुचाकी जप्त केली असून, त्याला पुढील कारवाईसाठी आनंदनगर पोलिसांच्या स्वाधीन केले आहे. आशिष ऊर्फ संतोष शंकर पारेकर असे अटक करण्यात आलेल्या संशयित चोरट्याचे नाव आहे.
आठवडी बाजार परिसरात पोलिसांनी रचला सापळा
स्थानिक गुन्हे शाखेचे पोलीस पथक गुरुवारी मालमत्तेविषयी घडलेल्या गुन्ह्यातील आरोपींचा माग काढत आणि माहिती गोळा करत सरकारी वाहनाने धाराशिव शहर पोलीस ठाण्याच्या हद्दीत पेट्रोलिंग करत होते. यादरम्यान पथकाला त्यांच्या विश्वसनीय गोपनीय बातमीदारामार्फत एक अत्यंत खात्रीशीर माहिती मिळाली. धाराशिव येथील आठवडी बाजार परिसरात एक इसम चोरीची मोटरसायकल स्वतःच्या ताब्यात बाळगून उभा असून तो ती विकण्याच्या किंवा लपवण्याच्या प्रयत्नात आहे, अशी माहिती पोलिसांना मिळाली.
माहिती मिळताच गुन्हे शाखेच्या पथकाने कोणतीही वेळ न दवडता आठवडी बाजार परिसरात जाऊन सापळा रचला आणि बातमीतील वर्णनाच्या संशयास्पद इसमाला शिताफीने ताब्यात घेतले.
चार महिन्यांपूर्वी ‘समर्थनगर’मधून केली होती चोरी
पोलिसांनी ताब्यात घेतलेल्या इसमाची कसून चौकशी केली असता, त्याने आपले नाव आशिष ऊर्फ संतोष शंकर पारेकर असे सांगितले. त्याच्या ताब्यातील मोटरसायकलच्या कागदपत्रांबाबत पोलिसांनी विचारपूस केली, मात्र त्याला कोणतीही वैध कागदपत्रे दाखवता आली नाहीत. पोलिसांनी पोलिसी खाक्या दाखवताच त्याने पोपटासारखे बोलण्यास सुरुवात केली.
सदर मोटरसायकल त्याने सुमारे चार महिन्यांपूर्वी धाराशिव शहरातील समर्थनगर भागातून चोरल्याची कबुली दिली. पोलिसांनी गुन्ह्यात वापरलेली आणि चोरी केलेली अंदाजे २०,००० रुपये किमतीची मोटरसायकल जप्त करून आरोपीला बेड्या ठोकल्या.
गुन्हे शाखेची कौतुकास्पद कामगिरी
सदरची यशस्वी कामगिरी धाराशिव जिल्ह्याच्या पोलीस अधीक्षक श्रीमती रितु खोखर आणि अपर पोलीस अधीक्षक सचिन पांडकर यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक विनोद इज्जपवार यांच्या थेट आदेशावरून सहायक पोलीस निरीक्षक (API) अमोल मोरे, पोलीस हेडकॉन्स्टेबल (पोहेकॉ) बळीराम शिंदे, अमोल चव्हाण, राहुल नाईकवाडी, महिला पोलीस अंमलदार (मपोह) शोभा बांगर आणि चालक पोलीस अंमलदार दहीहंडे यांच्या पथकाने ही धाडसी कारवाई पूर्ण केली.
आनंदनगर पोलिसांत वर्ग:
स्थानिक गुन्हे शाखेने आरोपी आशिष पारेकर याला चोरीच्या मुद्देमालासह पुढील कायदेशीर तपासासाठी आणि कारवाईसाठी आनंदनगर पोलीस ठाण्याच्या ताब्यात दिले आहे. या चोरट्याने जिल्ह्यात आणखी कुठे अशा चोऱ्या केल्या आहेत का, याचा तपास आता आनंदनगर पोलीस करत आहेत.
