तुळजापुरात पोलिसांचे ‘मेगा ऑपरेशन’! २ मटका अड्डे अन् २ ताडी केंद्रांवर एकाच वेळी छापे; १४ जणांना बेड्या, १३० लीटर ताडी नष्ट

तुळजापूर: धाराशिव जिल्ह्यामध्ये अवैध व्यवसायांचे समूळ उच्चाटन करण्यासाठी पोलीस प्रशासनाने अत्यंत कडक पावले उचलण्यास सुरुवात केली आहे. पोलीस अधीक्षक श्रीमती रीतु खोखर आणि अपर पोलीस अधीक्षक  सचिन पांडकर यांच्या थेट मार्गदर्शनाखाली गुरुवारी (दि. ४ जून २०२६) पवित्र तीर्थक्षेत्र तुळजापूर शहरात अवैधरित्या चालणाऱ्या मटका आणि ताडी केंद्रांवर एकाच वेळी धडक छापेमारी करण्यात आली. पोलिसांच्या या ‘सरप्राइज’ मोहिमेमुळे शहरातील अवैध धंदेवाल्यांचे धाबे दणाणले आहेत.

या धडक मोहिमेत पोलिसांनी २ बेकायदेशीर मटका अड्ड्यांवर, २ अवैध ताडी विक्री केंद्रांवर आणि १ ‘कोटपा’ (COTPA) कायद्यांतर्गत अशा एकूण ५ ठिकाणी एकाच वेळी छापेमारी केली.

असे आखले कारवाईचे ‘प्लॅनिंग’

ही योजनाबद्ध कारवाई परिवाक्षाधीन पोलीस उपअधीक्षकअमोल मोहिते यांना मिळालेल्या खात्रीशीर गोपनीय माहितीच्या आधारे करण्यात आली. माहिती मिळताच पोलिसांनी गुप्तता पाळत मोठ्या बंदोबस्तासह एकाच वेळी सर्व ठिकाणी छापे टाकले. या मोठ्या मोहिमेत  अमोल मोहिते यांच्यासह सहायक पोलीस निरीक्षक सुरेश कासुळे, सहायक पोलीस निरीक्षक प्रवीण सोमवंशी, पोलीस उपनिरीक्षक (PSI) रामचंद्र बहुरे, तसेच ‘क्यूआरटी’ (QRT) पथक, ‘आरसीपी’ (RCP) पथकातील पोलीस अंमलदार आणि चालकांनी अत्यंत महत्त्वाची भूमिका बजावली.

१४ जण रंगेहात ताब्यात; २ फरार

या धडक कारवाईदरम्यान पोलिसांनी जुगार खेळताना आणि ताडी विकताना एकूण १४ संशयितांना घटनास्थळावरून रंगेहात ताब्यात घेतले आहे. तर पोलिसांची चाहूल लागताच २ संशयित आरोपी अंधाराचा/गर्दीचा फायदा घेऊन फरार झाले. या सर्व कारवाईत पोलिसांनी हस्तगत केलेली अंदाजे १३० लीटर अवैध ताडी जागेवरच ओतून नष्ट केली आहे.

५ स्वतंत्र गुन्हे दाखल

या छाप्यांनंतर तुळजापूर पोलीस ठाण्यात एकूण ५ स्वतंत्र गुन्हे दाखल करण्यात आले आहेत. अटक आणि फरार आरोपींवर ‘महाराष्ट्र जुगार प्रतिबंधक अधिनियम, १८८७’ चे कलम १२ (अ), ‘महाराष्ट्र दारूबंदी अधिनियम’ कलम ६५-इ व ८४ तसेच ‘कोटपा’ (COTPA) ॲक्ट नुसार गुन्हे नोंदवण्यात आले आहेत.

पोलीस प्रशासनाचा कडक इशारा:

धाराशिव जिल्ह्यात कोणत्याही प्रकाराचे अवैध धंदे, जुगार किंवा अवैध दारू-ताडीची विक्री अजिबात खपवून घेतली जाणार नाही. जिल्ह्यात कुठेही असे बेकायदेशीर व्यवसाय सुरू असल्याचे आढळून आल्यास, संबंधितांविरुद्ध यापुढेही अशीच अत्यंत कडक आणि दंडात्मक कायदेशीर कारवाई करण्यात येईल, असा सज्जड इशारा पोलीस प्रशासनातर्फे देण्यात आला आहे. सध्या फरार असलेल्या २ आरोपींचा शोध पोलीस वेगाने घेत आहेत.