नळदुर्ग, ता. तुळजापूर : महाराष्ट्र शासनाने प्रतिबंधित केलेला गुटखा व तंबाखूजन्य पदार्थ साठवून विक्रीसाठी ठेवणाऱ्या एका व्यक्तीविरुद्ध नळदुर्ग पोलिसांनी गुन्हा दाखल केला असून, त्याच्याकडून सुमारे ३ लाख ५८ हजार ६१० रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, इस्माईल जबिउल्ला खुदरतुल्ला काझी (वय २२, रा. काझी गल्ली, नळदुर्ग) याच्या राहत्या घरात प्रतिबंधित गुटखा व तंबाखूजन्य पदार्थ विक्रीसाठी साठवून ठेवल्याची माहिती मिळाली होती. त्यानुसार अन्न व सुरक्षा अधिकारी, अन्न व औषध प्रशासन, धाराशिव यांच्या उपस्थितीत छापा टाकण्यात आला.
या कारवाईत बाबा तंबाखू, रत्ना ब्रँड तंबाखू, बाबा सेंटेटब तंबाखू आदी विविध प्रकारचा प्रतिबंधित माल आढळून आला. जप्त करण्यात आलेल्या साहित्याची एकूण किंमत ३ लाख ५८ हजार ६१० रुपये असल्याचे पोलिसांनी सांगितले.
याप्रकरणी नळदुर्ग पोलिसांनी संबंधित गुटखा साहित्य जप्त करून भारतीय न्याय संहिता कलम १२३, २२३, २७४, २७५ तसेच अन्न सुरक्षा व मानके अधिनियम कलम ५९ अन्वये इस्माईल काझी याच्याविरुद्ध गुन्हा नोंदविला आहे.
या प्रकरणाचा पुढील तपास नळदुर्ग पोलीस करीत आहेत.
