लोहारा : महिला बचत गटातील महिलांकडून गोळा केलेली हजारो रुपयांची रक्कम बँकेत जमा न करता, ती हडप करून एक मायक्रो फायनान्सचा कर्मचारी पसार झाल्याची धक्कादायक घटना लोहारा तालुक्यातील माकणी येथे समोर आली आहे. याप्रकरणी बँकेच्या असिस्टंट ब्रांच मॅनेजरच्या फिर्यादीवरून लोहारा पोलीस ठाण्यात गुन्हा दाखल करण्यात आला आहे.
विद्यासागर गोविंद खंडागळे (रा. मुरुम, ता. उमरगा, जि. धाराशिव) असे फसवणूक करून फरार झालेल्या कर्मचाऱ्याचे नाव आहे.
नेमका काय आहे प्रकार?
उमरगा येथील ‘सी. कॉमर्स मायक्रो फायनान्स’ या संस्थेमध्ये आरोपी विद्यासागर खंडागळे हा नोकरीस होता. त्याच्यावर माकणी (ता. लोहारा) येथील महिला बचत गटांकडून कर्जाचे हप्ते वसूल करण्याची जबाबदारी सोपवण्यात आली होती. त्यानुसार, ११ मार्च २०२६ रोजी सकाळी ७:०० वाजण्याच्या सुमारास तो माकणी येथे वसुलीसाठी गेला होता.
तेथील महिला बचत गटाच्या सदस्यांनी विश्वासाने दिलेली एकूण ५३,३६२ रुपयांची वसुलीची रक्कम आरोपी विद्यासागर याने घेतली. मात्र, ही रक्कम बँकेच्या खात्यात जमा न करता, स्वतःच्या फायद्यासाठी वापरून बँकेची आणि महिलांची फसवणूक केली व तो रक्कम घेऊन फरार झाला.
लोहारा पोलिसांत गुन्हा दाखल
हा आर्थिक गैरव्यवहार आणि फसवणुकीचा प्रकार उघडकीस आल्यानंतर, ‘सी. कॉमर्स मायक्रो फायनान्स’ उमरगा शाखेचे असिस्टंट ब्रांच मॅनेजर सुलतान सिराज मुतवल्ली (वय ३२ वर्षे, रा. उमरगा) यांनी १५ जून २०२६ रोजी लोहारा पोलीस ठाणे गाठून रीतसर तक्रार दिली.
पोलीस कारवाई:
फिर्यादी सुलतान मुतवल्ली यांच्या प्रथम खबरेवरून लोहारा पोलिसांनी आरोपी विद्यासागर खंडागळे याच्याविरुद्ध भारतीय न्याय संहिता (BNS) कलम ३१८(४) आणि ३१६(२) अन्वये गुन्हा नोंदवला आहे. पोलीस आता फरार आरोपीचा कसून शोध घेत आहेत.
