धाराशिव जिल्ह्यात पोलिसांचा ‘अ‍ॅक्शन मोड’! उमरगा, नळदुर्ग अन् येरमाळ्यात तलवारी आणि कोयत्यासह तिघे गजाआड; जिल्हाधिकाऱ्यांच्या आदेशाचे उल्लंघन

धाराशिव: जिल्ह्यात कायदा व सुव्यवस्था अबाधित राखण्यासाठी धाराशिव पोलीस दल सज्ज झाले असून काल (१७ जून) विविध पोलीस ठाण्यांच्या हद्दीत धडक कारवाया करण्यात आल्या. उमरगा, नळदुर्ग आणि येरमाळा येथे लोकांच्या जीवितास धोका निर्माण होईल अशा पद्धतीने बेकायदेशीर घातक शस्त्रे बाळगणाऱ्या ३ जणांना पोलिसांनी रंगेहात पकडले. त्यांच्याकडून तलवारी आणि कोयता जप्त करण्यात आला असून जिल्हाधिकाऱ्यांच्या शस्त्रबंदी आदेशाचे उल्लंघन केल्याप्रकरणी गुन्हे दाखल करण्यात आले आहेत.

१) उमरग्यात तलवारीसह फिरणारा तरुण पोलिसांच्या जाळ्यात

पहिली कारवाई उमरगा पोलीस ठाण्याच्या हद्दीत कुंभारपट्टी भागात झाली. १७ जून रोजी सायंकाळी ७:३० वाजण्याच्या सुमारास आरोपी राम भागवत जाधव (मूळ रा. कवठा, सध्या रा. कुंभार पट्टी, उमरगा) हा सार्वजनिक ठिकाणी ५०० रुपये किमतीची धारदार लोखंडी तलवार विनापरवाना बाळगून फिरत असताना उमरगा पोलिसांना मिळून आला.

• तक्रारदार: पोलीस नाईक यासीर नसीर सय्यद

• दाखल कलम: शस्त्र कायदा कलम ४, २५ सह भारतीय न्याय संहिता (BNS) कलम २२३ व महाराष्ट्र पोलीस कायदा (मपोका) कलम १३५.

२) नळदुर्ग पोलिसांची घरात छापा टाकून कारवाई; १९ वर्षांच्या मुलाकडून तलवार जप्त

दुसरी कारवाई नळदुर्ग पोलिसांनी तुळजापूर तालुक्यातील उमरगा (चि.) येथे केली. येथील रहिवासी असलेला १९ वर्षांचा तरुण हरिओम मनोज सावंत याने आपल्या राहत्या घरात विनापरवाना बेकायदेशीर रित्या तलवार लपवून ठेवली होती. १७ जून रोजी सायंकाळी ६:०० वाजता नळदुर्ग पोलिसांनी त्याच्या घरावर छापा टाकून ही तलवार जप्त केली.

• तक्रारदार: पोलीस अंमलदार सुदर्शन व्यंकट घुले

• दाखल कलम: शस्त्र कायदा कलम ४, २५ सह मपोका कलम १३५.

३) येरमाळा पोलिसांची हायवेवर मोठी कारवाई; कोयत्यासह एक जण जेरबंद

तिसरी कारवाई वाशी तालुक्यातील तेरखेडा येथे नॅशनल हायवे ५२ वर सूर्या हॉटेलच्या अलीकडे घडली. १७ जून रोजी सायंकाळी ६:०० वाजण्याच्या सुमारास आरोपी नवनाथ अनिल शिंदे (वय २६, रा. लक्ष्मी पारधी पिढी, तेरखेडा) हा हायवेलगत लोकांच्या जीवितास धोका निर्माण होईल अशा पद्धतीने विनापरवाना लोखंडी कोयता घेऊन थांबला होता. येरमाळा पोलिसांनी तात्काळ झडती घेऊन त्याला कोयत्यासह ताब्यात घेतले.

• तक्रारदार: पोलीस अंमलदार सूर्यजीत वाल्मीक कदम

• दाखल कलम: शस्त्र कायदा कलम ४, २५.

जिल्हाधिकाऱ्यांच्या आदेशाचा फज्जा उडवणाऱ्यांची गय नाही!

धाराशिव जिल्हाधिकाऱ्यांनी जिल्ह्यात शस्त्रबंदी लागू केली आहे. तरीही घातक शस्त्रे घेऊन दहशत निर्माण करणाऱ्यांवर धाराशिव पोलिसांनी एकाच दिवशी ही मोठी कारवाई करून गुन्हेगारांना कडक इशारा दिला आहे.