कळंबमध्ये खळबळ! ‘बियर बार टाकायचा आहे’ म्हणून ६ तोळे सोने अन् १५ लाख लाटले; पैसे मागताच महिलेला जातीवाचक शिवीगाळ व मारहाण

धाराशिव: कळंब शहरातील जिजाऊनगर शिक्षक कॉलनी परिसरातून एक मोठी आर्थिक फसवणूक आणि अत्याचाराची धक्कादायक घटना समोर आली आहे. ‘बियर बार’ सुरू करायचा आहे, असे सांगून एका महिलेला सांभाळण्याचे आमिष दाखवले आणि तिच्याकडून तब्बल ६ तोळे सोन्याचे दागिने व १५ लाख ६२ हजार रुपयांची रोकड लाटून फसवणूक करण्यात आली. धक्कादायक म्हणजे, हडप केलेले सोने आणि पैसे परत मागितले असता पीडित महिलेला जातीवाचक शिवीगाळ करत बेदम मारहाण करण्यात आली. याप्रकरणी कळंब पोलीस ठाण्यात महिलांसह चौघांवर ॲट्रॉसिटी आणि फसवणुकीचा गुन्हा दाखल झाला आहे.

जयश्री बबनराव कोंबडे (वय ४५ वर्षे, रा. जिजाऊनगर शिक्षक कॉलनी, कळंब) असे फसवणूक व मारहाण झालेल्या पीडित महिलेचे नाव आहे.

४ वर्षांपासून सुरू होता फसवणुकीचा खेळ

पोलीस सूत्रांकडून मिळालेल्या माहितीनुसार, हा फसवणुकीचा प्रकार २३ ऑगस्ट २०२२ पासून ते १४ जून २०२६ दरम्यान घडला. मुख्य आरोपी संतोष कोठावळे याने फिर्यादी जयश्री कोंबडे यांना ‘तुझा सांभाळ करतो’ असे आमिष दाखवून त्यांचा विश्वास संपादन केला. त्यानंतर “मला स्वतःचा बियर बार सुरू करायचा आहे,” अशी बतावणी त्याने केली.

बार सुरू करण्याच्या बहाण्याने संतोष कोठावळे आणि त्याच्या साथीदारांनी जयश्री यांच्याकडून वेळोवेळी ६ तोळे सोन्याचे दागिने आणि तब्बल १५,६२,०३४ रुपये (१५ लाख ६२ हजार ३४ रु.) रोख रक्कम उकळली.

पैसे मागताच रंग दाखवला; मारहाण आणि जातीवाचक शिवीगाळ

काही दिवस उलटूनही पैसे आणि सोने परत न मिळाल्याने जयश्री कोंबडे यांनी आरोपींकडे आपल्या हक्काच्या पैशांची आणि दागिन्यांची मागणी केली. याचा राग मनात धरून आरोपींनी त्यांना पैसै देण्यास साफ नकार दिला. तसेच सर्वांनी मिळून जयश्री यांना अश्लील शिवीगाळ करत लाथाबुक्क्यांनी बेदम मारहाण केली व जखमी केले. एवढ्यावरच न थांबता आरोपींनी त्यांना जाहीररीत्या जातीवाचक शिवीगाळ करून अपमानित केले आणि “पुन्हा पैसे मागितले तर जिवे ठार मारू,” अशी धमकी दिली.

दोन महिलांसह चौघांवर गुन्हा दाखल

आपली मोठी आर्थिक फसवणूक झाल्याचे आणि जीवाला धोका असल्याचे लक्षात येताच जयश्री कोंबडे यांनी कळंब पोलीस ठाण्यात धाव घेतली. त्यांनी १९ जून २०२६ रोजी दिलेल्या तक्रारीवरून पोलिसांनी पुढील चार आरोपींविरुद्ध गुन्हा दाखल केला आहे:

१. संतोष अनंतराव कोठावळे

२. गणेश नंदकिशोर कोठावळे

३. सारिका संतोष कोठावळे (तिघे रा. द्वारकानगरी, कळंब)

४. गीतांजली संजय उंदरे (रा. वाशी, ता. वाशी, जि. धाराशिव)

पोलीस कारवाई आणि कलमे:

कळंब पोलिसांनी चारही आरोपींविरुद्ध भारतीय न्याय संहिता (BNS) कलम ३१८(२), ३१८(४) (फसवणूक), ११५(२), ३३३, ३५२, ३५१(२), ३५१(३) सह अनुसूचित जाती आणि अनुसूचित जमाती अत्याचार प्रतिबंधक कायदा (ॲट्रॉसिटी ॲक्ट) कलम ३(१)(आर)(एस) अन्वये गुन्हा नोंदवला आहे. एवढ्या मोठ्या रक्कमेची फसवणूक आणि ॲट्रॉसिटीचा गुन्हा दाखल झाल्याने कळंब शहरात तीव्र खळबळ उडाली असून पोलीस या प्रकरणाचा सखोल तपास करत आहेत.