कळंब तालुक्यात ‘सायलेन्स रेड’! भाड्याच्या खोलीत लपवलेला तब्बल ५९ लाखांचा प्रतिबंधित गुटखा जप्त

कळंब: कळंब पोलीस ठाण्याच्या हद्दीत गुटखा आणि प्रतिबंधित तंबाखूजन्य पदार्थांच्या काळ्या बाजाराविरोधात पोलिसांनी आतापर्यंतची सर्वात मोठी कारवाई केली आहे. डिकसव गावातील एका घराच्या खोलीवर अचानक छापा टाकून मानवी आरोग्यास अपायकारक असणारा तब्बल ५९ लाख २३ हजार १२८ रुपये किमतीचा विविध नामवंत कंपन्यांचा गुटखा साठा पोलिसांनी जप्त केला आहे. या कारवाईने जिल्ह्यातील मोठ्या गुटखा तस्करांचे धाबे दणाणले आहेत.

गोपनीय माहितीवर डीवायएसपींची ‘सर्जिकल’ कारवाई

धाराशिव जिल्हा पोलीस अधीक्षक श्रीमती रितु खोखर व अपर पोलीस अधीक्षक श्री. सचिन पांडकर यांच्या मार्गदर्शनाखाली सध्या जिल्ह्यात अवैध धंद्यांचे कंबरडे मोडण्यासाठी विशेष मोहीम सुरू आहे. २४ जून २०२६ रोजी परिविक्षाधीन पोलीस उपअधीक्षक (DySP) श्री. अमोल मोहिते यांना त्यांच्या खास बातमीदाराकडून पक्की माहिती मिळाली की, डिकसव गावात मोठ्या प्रमाणावर प्रतिबंधित गुटख्याचा साठा दडवून ठेवण्यात आला आहे.

माहिती मिळताच डीवायएसपी अमोल मोहिते यांनी दोन पंचांना सोबत घेऊन तात्काळ डिकसव गाठले आणि स्थानिक रहिवासी प्रभाकर भैरुबा चौधरी यांच्या घरातील एका बंद खोलीवर छापा टाकला.

भाड्याची खोली अन् गुटख्याचा डोंगर!

पोलिसांनी खोली उघडून पाहिली असता तिथे वेगवेगळ्या नामांकित कंपन्यांच्या गुटख्याचे आणि सुगंधी तंबाखूचे शेकडो बॉक्स आणि पोती मिळून आली. याबाबत घरमालक प्रभाकर चौधरी यांच्याकडे कसून चौकशी केली असता, त्यांनी सांगितले की ही खोली त्यांनी मागील एक महिन्यापासून गणेश भिकाजी घेवारे (रा. डिकसव) याला भाड्याने दिली होती. पोलिसांनी अधिक तपास केला असता हा संपूर्ण बेकायदेशीर साठा गणेश घेवारे यानेच विक्रीसाठी साठवला असल्याचे निष्पन्न झाले.

झालेल्या छाप्यात खालीलप्रमाणे अवाढव्य मुद्देमाल जप्त करण्यात आला:

याशिवाय एबी सुगंधी तंबाखू (२५० पुडे), अलीबाबा पान मसाला (२२५ पुडे), रत्नछाप No. ३०० (२२४ पुडे), जायका १००० (६० पुडे), सोसायटी पान मसाला (५० पुडे), व्हीटी सुगंधी तंबाखू (५० पुडे), आरके वर्ल्ड सुगंधी तंबाखू (४० पुडे) आणि ओरिजनल ३०० सुगंधी तंबाखूचे २६ पुडे जप्त करण्यात आले. हा एकूण मुद्देमाल ₹५९,२३,१२८/- किमतीचा आहे.

अन्न व औषध प्रशासनाकडे अहवाल सादर

जप्त केलेला हा सर्व साठा जप्त करून कळंब पोलीस ठाण्यात सुरक्षितपणे जमा करण्यात आला आहे. हा साठा मानवी आरोग्यास अत्यंत घातक आणि महाराष्ट्रात पूर्णपणे प्रतिबंधित असल्याने, ‘अन्न सुरक्षा व मानके कायद्या’नुसार पुढील कडक कायदेशीर कारवाईसाठी अन्न व औषध प्रशासन (FDA), धाराशिव यांच्याकडे आवश्यक तो अहवाल सादर करण्यात आला आहे.

कारवाईत सहभागी शौर्यवान पथक

ही धडाकेबाज कामगिरी डीवायएसपी  अमोल मोहिते यांच्या थेट नेतृत्वाखाली सहाय्यक पोलीस निरीक्षक प्रवीण सोमवंशी,  सुरेश कासुळे, पोलीस उपनिरीक्षक रामचंद्र बहुरे, सिराज पठाण तसेच आरसीपी (RCP), क्यूआरटी (QRT) विशेष पथकातील अधिकारी-कर्मचारी आणि कळंब पोलीस ठाण्याच्या पोलीस अंमलदारांनी मिळून केली आहे.