धाराशिव – धाराशिव ग्रामीण पोलीस ठाण्याच्या हद्दीतील कौडगाव शिवारात असलेल्या ‘महाजेनको व भेल कंपनी’च्या सौर ऊर्जा (सोलर) प्रकल्पाला अज्ञात चोरट्यांनी लक्ष्य केले आहे. चोरट्यांनी प्रकल्पाच्या सुरक्षा यंत्रणेला गुंगारा देत सौर पॅनलला जोडलेली तब्बल १३ किलोमीटर लांबीची तांब्याची तार कापून चोरून नेली आहे. या धाडसी चोरीप्रकरणी धाराशिव ग्रामीण पोलीस ठाण्यात गुन्हा दाखल करण्यात आला आहे.
सोलर प्रकल्पाच्या ‘पी ३’ एरियात डल्ला
पोलिसांकडून मिळालेल्या प्राथमिक माहितीनुसार, कौडगाव येथे ‘महाजेनको आणि भेल कंपनी प्रायव्हेट लिमिटेड’चा मोठा सौर ऊर्जा प्रकल्प कार्यरत आहे. २५ जून २०२६ च्या मध्यरात्री १२:०० ते २६ जून २०२६ च्या सकाळी ६:०० वाजण्याच्या सुमारास अज्ञात चोरट्यांनी या प्रकल्पाच्या आवारात प्रवेश केला.
१३ किलोमीटर तांब्याची तार केली लंपास
प्रकल्पातील आयआर-१ (IR-1) आणि आयआर-२ (IR-2) लोकेशनवरील ‘पी ३’ (P3) एरियामध्ये सौर ऊर्जा पॅनलला जोडलेली ४ स्क्वेअर मिमीची अंदाजे १३ किलोमीटर लांबीची (१७४ तांब्याची तार) अज्ञात चोरट्यांनी कटरच्या साहाय्याने कापून चोरून नेली. या चोरीला गेलेल्या तांब्याच्या तारेची एकूण किंमत ४५,००० रुपये आहे.
हा चोरीचा प्रकार उघडकीस आल्यानंतर कंपनीचे अधिकारी सागर मोहन येलगुंटवार (वय ३७ वर्षे, मूळ रा. मोंढा, ता. हिंगणा, जि. नागपूर) यांनी १ जुलै २०२६ रोजी धाराशिव ग्रामीण पोलीस ठाण्यात रीतसर फिर्याद दिली.
धाराशिव ग्रामीण पोलिसांत गुन्हा दाखल
सागर येलगुंटवार यांच्या प्रथम खबरीवरून पोलिसांनी अज्ञात चोरट्याविरुद्ध भारतीय न्याय संहिता (BNS) कलम ३०३(२) (चोरी) अन्वये गुन्हा नोंदवला आहे. एवढ्या मोठ्या प्रमाणावर तारेची चोरी करण्यासाठी चोरट्यांनी वाहनाचा वापर केला असावा, असा पोलिसांचा संशय आहे. ग्रामीण पोलीस या प्रकरणाचा पुढील तपास करत असून प्रकल्पाच्या सुरक्षेचा मुद्दा पुन्हा ऐरणीवर आला आहे.
