धाराशिव | तुळजापूर तालुक्यात एसटी महामंडळाचा राज्यातील पहिला सौर ऊर्जा प्रकल्प उभारण्यात येणार असून, हा प्रकल्प महाराष्ट्रातील सार्वजनिक वाहतूक क्षेत्रासाठी महत्त्वाचा टप्पा ठरणार असल्याची माहिती खासदार ओमराजे निंबाळकर यांनी त्यांच्या अधिकृत फेसबुक पोस्टद्वारे दिली आहे.
खासदार निंबाळकर यांनी म्हटले आहे की, एसटी बस आगारातील विविध कार्यालये तसेच ई-बस चार्जिंगसाठी मोठ्या प्रमाणात विजेची आवश्यकता भासते. त्यामुळे दरवर्षी कोट्यवधी रुपयांचा वीजखर्च होतो. हा खर्च कमी करून एसटी महामंडळाला ऊर्जा क्षेत्रात स्वावलंबी करण्याच्या उद्देशाने स्वतःचे सौर ऊर्जा प्रकल्प उभारण्याची संकल्पना मांडण्यात आली होती.
या संकल्पनेची अंमलबजावणी करत राज्यातील पहिला सौर ऊर्जा प्रकल्प तुळजापूर तालुक्यातील चिवरी, होर्टी आणि मुर्टा या तीन गावांमधील सुमारे 841 एकर शासकीय पडीक जमिनीवर उभारला जाणार असल्याचे त्यांनी नमूद केले आहे.
या प्रकल्पासाठी आवश्यक जागेची पाहणी करण्याचे निर्देश 18 मे 2026 रोजी जिल्हाधिकाऱ्यांना देण्यात आले होते. त्यानुसार निवासी उपजिल्हाधिकाऱ्यांनी संबंधित जागेची पाहणी करून सौर ऊर्जा प्रकल्पासाठी ती योग्य असल्याचा अहवाल सादर केला आहे. त्यामुळे या प्रकल्पाच्या प्रत्यक्ष कामाला लवकरच सुरुवात होण्याची अपेक्षा व्यक्त करण्यात आली आहे.
खासदार निंबाळकर यांच्या मते, या प्रकल्पामुळे हरित ऊर्जेची निर्मिती होण्याबरोबरच एसटी महामंडळाच्या वीजखर्चात मोठी बचत होईल आणि महामंडळाच्या आर्थिक स्वावलंबनाला चालना मिळेल. तसेच पर्यावरणपूरक ऊर्जा वापराला प्रोत्साहन मिळून सार्वजनिक वाहतूक क्षेत्रासाठी हा प्रकल्प नवा आदर्श ठरेल.
या महत्त्वाकांक्षी प्रकल्पासाठी सहकार्य व सकारात्मक पाठबळ दिल्याबद्दल पालकमंत्री प्रताप सरनाईक यांचेही खासदार ओमराजे निंबाळकर यांनी फेसबुक पोस्टद्वारे आभार मानले आहेत.
