धाराशिव : धाराशिव–बीड–छत्रपती संभाजीनगर या महत्त्वाकांक्षी रेल्वेमार्गाच्या उभारणीला गती मिळाली असून, या प्रकल्पाच्या सर्वेक्षणाला मंजुरी मिळाल्याची माहिती धाराशिवचे खासदार ओमराजे निंबाळकर यांनी फेसबुक पोस्टद्वारे दिली आहे. तसेच या रेल्वेमार्गाचा सविस्तर प्रकल्प अहवाल (डीपीआर) तयार करण्याचे कामही सुरू झाल्याचे त्यांनी नमूद केले आहे.
खासदार निंबाळकर यांनी आपल्या पोस्टमध्ये म्हटले आहे की, धाराशिव जिल्ह्याच्या विकासाच्या दृष्टीने हा रेल्वेमार्ग अत्यंत महत्त्वाचा ठरणार आहे. या मार्गामुळे मराठवाड्यातील दळणवळण व्यवस्था अधिक सक्षम होईल. धाराशिव, बीड आणि छत्रपती संभाजीनगर या तीन जिल्ह्यांच्या आर्थिक, औद्योगिक आणि सामाजिक विकासाला नवी दिशा मिळेल, असा विश्वास त्यांनी व्यक्त केला.
या रेल्वेमार्गासाठी आपण सातत्याने पाठपुरावा केला असून, त्यातूनच सर्वेक्षणास मंजुरी आणि डीपीआर तयार करण्याच्या प्रक्रियेला सुरुवात झाली असल्याचेही खासदार ओमराजे निंबाळकर यांनी आपल्या पोस्टमध्ये नमूद केले आहे.
हा रेल्वेमार्ग प्रत्यक्षात साकार झाल्यास मराठवाड्यातील प्रवासी व मालवाहतूक अधिक सुलभ होण्यास मदत होणार असून, या भागातील विकासाला मोठी चालना मिळण्याची अपेक्षा व्यक्त केली जात आहे.
