उमरगा: धाराशिव जिल्ह्यात बालविवाहाच्या आणि अल्पवयीन मुलीवरील अत्याचाराच्या घटना थांबण्याचे नाव घेत नसून, उमरगा पोलीस ठाण्याच्या हद्दीत आणखी एक अत्यंत गंभीर प्रकार समोर आला आहे. अवघ्या साडेसतरा वर्षांच्या अल्पवयीन मुलीचा तिच्या आई-वडिलांनी बळजबरीने बालविवाह लावून दिला. लग्नानंतर पतीने ठेवलेल्या शारीरिक संबंधांमुळे ती मुलगी गर्भवती राहिली आणि तिने एका कन्यारत्नाला जन्म दिला. मुलीने वैद्यकीय उपचारादरम्यान दिलेल्या तक्रारीवरून उमरगा पोलीस ठाण्यात आई-वडिलांसह पती आणि नातेवाइकांनविरुद्ध पोक्सो आणि बालविवाह प्रतिबंधक कायद्यानुसार गुन्हा दाखल करण्यात आला आहे.
अल्पवयीन असल्याचे माहीत असूनही लावून दिले लग्न
पोलिसांकडून मिळालेल्या प्राथमिक माहितीनुसार, पीडित मुलगी ही अवघी १८ वर्षे ५ महिने वयाची (घटनेच्या वेळी व लग्नादरम्यान अवघी १७ वर्षांची अल्पवयीन) आहे. १४ मे २०२५ ते १७ जुलै २०२६ या कालावधीत मुलगी अल्पवयीन आहे हे स्पष्टपणे माहीत असतानाही तिच्या आई-वडिलांनी तिचा विवाह एका गावातील तरुणाशी लावून दिला.
लग्नानंतर पतीने तिच्यासोबत इच्छेविरुद्ध व अल्पवयीन असताना शारीरिक संबंध ठेवले. यामुळे ती मुलगी गरोदर राहिली. नुकतीच तिची प्रसूती झाली असून तिने एका स्त्री जातीच्या (मुलगी) बालकास जन्म दिला आहे.
पीडितेच्या तक्रारीवरून उमरगा पोलिसांत गुन्हा दाखल
प्रसूतीनंतर आणि वैद्यकीय तपासणीदरम्यान मुलगी अल्पवयीन असताना तिचे लग्न लावून दिल्याचे व ती माता झाल्याचे समोर आले. पीडित मुलीने स्वतः २४ जुलै २०२६ रोजी उमरगा पोलीस ठाणे गाठून आपल्यावर झालेल्या अन्यायाविरुद्ध फिर्याद दिली. बालिकेचे नाव व गाव सुरक्षेच्या कारणास्तव पूर्णपणे गोपनीय ठेवण्यात आले आहे.
-
आरोपी: पीडितेचा पती, आई-वडील आणि संबंधित नातेवाईक.
-
दाखल कलमे: पोलिसांनी आरोपींविरुद्ध भारतीय न्याय संहिता (BNS) कलम ६४(२), ६४(२)(एम) (बलात्कार), ३(५) (समान उद्देशाने एकत्र येणे) सह बालविवाह प्रतिबंधक अधिनियम २००६ चे कलम ९, १०, ११ आणि बालकांचे लैंगिक अपराधांपासून संरक्षण अधिनियम (POCSO Act) २०१२ चे कलम ६ अन्वये गुन्हा नोंदवला आहे.
अल्पवयीन मुलींचे आयुष्य बालविवाहाच्या दावणीला बांधणाऱ्या अशा निष्काळजी आणि बेकायदेशीर कृत्यांवर कठोर कारवाई करण्याची मागणी नागरिकांमधून जोर धरत आहे. उमरगा पोलीस ठाण्याचे पथक या गुन्ह्याचा पुढील सखोल तपास करत आहे.
