खोटे अपघात दाखवून विमा कंपन्यांना गंडा घालणाऱ्या रॅकेटचा पर्दाफाश; उमरगा पोलिसांत धाव

उमरगा – एकाच वाहनावर वेगवेगळ्या ठिकाणी खोटे अपघात झाल्याचे दाखवून आणि एकाच रुग्णालयात उपचार घेतल्याची बनावट कागदपत्रे तयार करून विमा कंपन्यांची लाखो रुपयांची फसवणूक करणाऱ्या रॅकेटचा पर्दाफाश झाला आहे. याप्रकरणी बजाज अलियांझ जनरल इन्शुरन्स कंपनीच्या अधिकाऱ्याने उमरगा पोलीस ठाण्यात सविस्तर तक्रार दाखल केली असून, कर्नाटकच्या आळंद तालुक्यातील दोघांविरुद्ध कायदेशीर कारवाईची मागणी केली आहे.

मिळालेल्या माहितीनुसार, बजाज जनरल इन्शुरन्स कंपनीचे सोलापूर येथील ऑपरेशन सर्व्हिसेस मॅनेजर सोपान रावणराव बिरादार (वय ४०) यांनी याबाबतचा जबाब नोंदवला आहे. दिनांक ८ एप्रिल २०२६ रोजी कंपनीला कलबुर्गी येथील मोटार अपघात दावा प्राधिकरणाकडून एका दाव्याबाबत (दावा क्र. १७/२०२६) समन्स आले होते. भिमराव गुणवंत काळे (रा. कासार शिरशी, ता. निलंगा) यांनी हा दावा दाखल केला होता. त्यांच्या दाव्यानुसार, एम.एच. २५ डब्ल्यू ६४९५ या क्रमांकाच्या मोटारसायकलने त्यांना उमरगा येथे धडक दिली होती. या वाहनाचा मालक युवराज शिवलिंगप्पा कारभारी (रा. खजुरी, ता. आळंद, जि. कलबुर्गी) हा आहे.

असा झाला भांडाफोड:

या समन्सनंतर बजाज इन्शुरन्सच्या लीगल टीमने सखोल चौकशी केली असता धक्कादायक माहिती समोर आली. युवराज कारभारी याच्या मालकीच्या याच मोटारसायकलवर उमरगा आणि मदनहिप्परगा (ता. आळंद) पोलीस ठाण्यात वेगवेगळे गुन्हे दाखल असल्याचे निष्पन्न झाले. तसेच, कलबुर्गी कोर्टात आकाश शिवाजी घोटाळे (रा. किन्नीसुलतान) यानेही याच गाडीचा (MH 25 W 6495) वापर करून अपघात दावा (क्र. २४६/२०२४) दाखल केल्याचे उघडकीस आले.

तपासात रमेश करसप्पा शेरी (रा. खजुरी, ता. आळंद) याचेही नाव समोर आले. त्याच्या मालकीच्या चारचाकी (KA 28 M 2780) आणि दुचाकी (KA 32 EN 4684) वाहनांवर वेगवेगळ्या विमा कंपन्यांकडे तब्बल १०-१० दावे दाखल असल्याचे व त्यापैकी २ दावे बजाज कंपनीकडे असल्याचे समोर आले आहे.

फसवणुकीची कार्यपद्धती (Modus Operandi):

युवराज कारभारी आणि रमेश शेरी यांनी संगनमत करून हा गोरखधंदा चालवला होता. या टोळीने अपघात झाल्यानंतर जखमी झाल्याचे भासवून उपचारासाठी केवळ उमरगा येथील ‘ओम मल्टीस्पेशालिटी हॉस्पिटल’चीच कागदपत्रे वापरल्याचे निदर्शनास आले आहे. एकच वाहन आणि एकच मालक दाखवून वेगवेगळ्या पोलीस ठाण्यांत खोटे गुन्हे दाखल करणे आणि स्वतःच्या आर्थिक फायद्यासाठी विमा कंपन्यांकडून पैसे उकळणे हा या टोळीचा मुख्य उद्देश होता.

या सर्व प्रकरणाची कागदपत्रे आणि ४ दाव्यांचे पुरावे सोपान बिरादार यांनी उमरगा पोलिसांना सादर केले आहेत. खोटे अपघात दाखवून फसवणूक करणाऱ्या युवराज कारभारी आणि रमेश शेरी यांच्यावर कडक कायदेशीर कारवाई करण्याची मागणी या फिर्यादीत करण्यात आली आहे. या घटनेमुळे विमा क्षेत्रात मोठी खळबळ उडाली असून, अशा प्रकारच्या आणखी किती बोगस केसेस या टोळीने केल्या आहेत, हे पोलीस तपासानंतरच स्पष्ट होईल.