प्रवेश पहिला: सत्तेची जादू आणि निष्ठावंतांचे अश्रू
राजकारणाच्या रंगमंचावर एक भस्मासुर होता. या भस्मासुराविरुद्ध ‘कमळाबाईच्या’ निष्ठावंत ‘हाफ चड्डी’ वाल्यांनी तब्बल ४० वर्षे असा काही घाम गाळला की जणू तो स्वातंत्र्यलढाच! पण राजकारणात कधी काय होईल याचा नेम नसतो. २०१९ च्या लोकसभा निवडणुकीत भस्मासुराचा दारुण पराभव झाला आणि सत्तेविना तडफडणाऱ्या या भस्मासुराने थेट ‘कमळाबाईच्या’ गोटातच उडी मारली.
कालपर्यंत ज्याच्या नावाने बोटे मोडली, त्यालाच आता गळ्यात गळे घालून “जय” म्हणण्याची पाळी निष्ठावंतांवर आली. बिचाऱ्या कार्यकर्त्यांनी रडत-खडत घोट गिळला, जुने वैर विसरून त्याचा प्रचार केला आणि त्याला विधानसभा जिंकून दिली. भस्मासुर पुन्हा फॉर्ममध्ये आला!
प्रवेश दुसरा: बकुळाबाई, लाडकी बहीण आणि ‘मी पणा’
बघता-बघता २०२४ ची लोकसभा निवडणूक आली. भस्मासुराने अति-उत्साहात आपल्या सौभाग्यवती ‘बकुळाबाईंना’ रिंगणात उतरवले. पण जनतेने त्यांना “येतो आम्ही” म्हणत घरी बसवले. त्यानंतर आलेल्या विधानसभा निवडणुकीत मात्र ‘लाडक्या बहिणीच्या’ पुण्याईने भस्मासुर कसातरी वाचला.
पण भस्मासुराला वाटले की हा सारा चमत्कार आपलाच आहे! नगरपालिका, जिल्हा परिषद आणि पंचायत समितीच्या निवडणुका आल्या. कमळाबाईच्या निष्ठावंतांनी पायाला भिंगरी लावून अहोरात्र मेहनत केली आणि घवघवीत यश मिळवून दिले. पण विजयाचा गुलाल उधळताना भस्मासुराने कॉलर टाईट केली आणि जाहीर केले, “हे सगळं फक्त माझ्यामुळेच झालं!” बक्षीस म्हणून त्याने स्वतःच्याच बकुळाबाईंना थेट अध्यक्षपदाच्या खुर्चीवर बसवून टाकले.
प्रवेश तिसरा: बकासुर आणि नागपूरचे पोलार्ड
आता मात्र भस्मासुराच्या डोक्यात सत्तेची आणि पैशाची हवा गेली होती. तो ३५-३५ वर्षे सतरंज्या उचलणाऱ्या जुन्या निष्ठावंतांना चक्क ‘तुच्छ’ समजू लागला. साहेबांचा रुबाब एवढा वाढला की, एखादा साधा-सुधा मंत्री आला, तर भस्मासुर स्वतः एसी केबिनमधून बाहेर न येता आपल्या ‘बकासुराला’ (पीए/चमचा) पुढे करू लागला. साहेबांचा नियम एकच – “नागपूरचे ‘पोलार्ड’ किंवा ‘भाऊ’ आले, तरच आपण स्वतः हजर राहायचं, बाकी चिल्लर पार्टीला बकासुर बघून घेईल!”
प्रवेश चौथा (क्लायमॅक्स): सातारकरांचा दौरा आणि भस्मासुराची घमेंड
परवा गावात संपर्कमंत्री ‘सातारकर’ आले होते. भस्मासुराने स्वतःची आणि बायकोची पाठ थापटून घेण्यासाठी एक भव्य ‘इव्हेंट’ आयोजित केला. त्यात मित्र पक्षासोबत राडा तर झालाच, पण भस्मासुराने तिथे कळस गाठला. ३५ वर्षे कमळाबाईची सेवा करणाऱ्या एका कट्टर निष्ठावंताचा त्याने भर सभेत घोर अपमान केला आणि त्याला सातारकरांना भेटूच दिले नाही.
हा अपमान जिव्हारी लागल्याने आता सगळ्या ‘हाफ चड्डी’ वाल्यांच्या रागाचा स्फोट झाला आहे. “ज्या भस्मासुराला आपणच सत्तेचं वरदान देऊन मोठं केलं, तो आता आपल्याच डोक्यावर हात ठेवून आपलाच गेम करायला निघालाय,” हे विदारक सत्य त्यांना अखेर उमगले आहे.
सध्या शहरात एकच चर्चा आहे… सर्व हाफ चड्डी वाले आता गुप्तपणे एकत्र आले असून, या ‘मॉडर्न भस्मासुराचा’ करेक्ट कार्यक्रम (नायनाट) कसा करायचा, याची खतरनाक रणनीती आखण्यास सुरुवात झाली आहे! पिक्चर अभी बाकी है…
– बोरूबहाद्दर
