उमरगा: उमरगा येथील उपजिल्हा रुग्णालयाच्या वैद्यकीय अधीक्षक डॉ. कोमल हरीदास गरड (जाधव) यांना “माहिती दिली नाही तर नोकरी घालवतो” अशी धमकी देत ५ लाख रुपयांची खंडणी मागण्याचा आणि हातापाई करून विनयभंग करण्याचा धक्कादायक प्रकार उघडकीस आला आहे. शासकीय कामात अडथळा आणून रुग्णालयातील कर्मचाऱ्यांशी अरेरावी करणाऱ्या दोन जणांविरुद्ध उमरगा पोलीस ठाण्यात गुन्हा दाखल करण्यात आला आहे.
शासकीय कार्यालयात घुसून ५ लाखांची खंडणी मागितली
पोलिसांकडून व प्राप्त फिर्यादीवरून मिळालेल्या सविस्तर माहितीनुसार, डॉ. कोमल गरड (वय ४५ वर्षे, रा. आरोग्य नगर, उमरगा) या गेल्या दोन वर्षांपासून उपजिल्हा रुग्णालय, उमरगा येथे वैद्यकीय अधीक्षक म्हणून कार्यरत आहेत.
२० जुलै २०२६ रोजी दुपारी ३:३० ते ४:०० वाजण्याच्या सुमारास डॉ. गरड या आपल्या कक्षातून बाहेर जात असताना, प्रफुल्ल श्रावण गायकवाड (रा. औराद) आणि ज्ञानेश्वर पांडुरंग जाधव (रा. तुरोरी) हे दोघे त्यांच्या जवळ आले. प्रफुल्ल गायकवाड याने रुग्णालयाच्या जनरेटरच्या डिझेलची माहिती मागितली. यावर डॉ. गरड यांनी “रीतसर अर्ज द्या, मग माहिती दिली जाईल” असे सांगितले.
त्याचा राग धरून प्रफुल्ल याने, “उपसंचालक आरोग्य विभाग रेखा गायकवाड मॅडम माझ्या नातेवाईक आहेत. तुमच्याविरोधात चौकशी लावून तुम्हाला बडतर्फ करतो, नोकरी घालवतो, तुमची धिंड काढतो. हे टाळायचे असेल तर मला ५ लाख रुपये द्यावे लागतील” अशी थेट धमकी दिली. तर ज्ञानेश्वर जाधव यानेही ५ लाख रुपयांची मागणी लावून धरली.
हात ओढून विनयभंग अन् कामात अडथळा
पैसे देण्यास नकार दिला असता आरोपींनी डॉ. गरड यांच्यासोबत हातापाई करत त्यांचा डावा हात ओढला. यामुळे त्यांच्या मनास लज्जा उत्पन्न झाली. त्यानंतर आरोपींनी रुग्णालयातील कर्मचारी जनाबाई कुंभार आणि फुलसुंदर यांच्या कक्षात जाऊन डिझेलचे रजिस्टर बळजबरीने कपाटातून काढून त्याचे फोटो काढण्याचा प्रयत्न केला व शासकीय कामात अडथळा निर्माण केला.
वरिष्ठांशी चर्चा करून उमरगा पोलिसांत तक्रार
शासकीय कार्यालयात घडलेल्या या गंभीर प्रकारानंतर डॉ. कोमल गरड यांनी वरिष्ठांशी चर्चा करून उमरगा पोलीस ठाणे गाठून दोन्ही आरोपींविरुद्ध फिर्याद दिली आहे.
त्यांच्या तक्रारीवरून उमरगा पोलिसांनी आरोपी प्रफुल्ल श्रावण गायकवाड आणि ज्ञानेश्वर पांडुरंग जाधव यांच्याविरुद्ध खंडणी, शासकीय कामात अडथळा आणणे, विनयभंग आणि धमकी दिल्याप्रकरणी गुन्हा नोंदवला असून पोलीस पुढील सखोल तपास करत आहेत.
