कळंब: परभणी जिल्ह्यातील मानवत पोलिसांच्या अमली पदार्थ (एमडी ड्रग्ज) तस्करी विरोधी कारवाईत अटक करण्यात आलेला कळंबचा नगरसेवक मोहसीन सलीम मिर्झा याच्यावर शिवसेनेने (उद्धव बाळासाहेब ठाकरे गट) मोठी कारवाई केली आहे. ड्रग्ज प्रकरणात नाव समोर आल्यानंतर मिर्झा याची पक्षातून तातडीने हकालपट्टी करण्यात आली असल्याची माहिती पक्षाचे जिल्हाप्रमुख तथा आमदार कैलास पाटील यांनी दिली आहे.
कारवाईची पार्श्वभूमी:
मानवत (परभणी) येथे २६ जुलै रोजी ७३ ग्रॅम एमडी ड्रग्ज जप्त करण्यात आले होते. या प्रकरणाच्या सखोल तपासात कळंब येथील नगरसेवक मोहसीन मिर्झा याचे नाव निष्पन्न झाल्यानंतर, परभणी पोलिसांनी ८ ऑगस्ट रोजी रात्री त्याला बेड्या ठोकल्या. एका लोकप्रतिनिधीचे नाव थेट आंतरजिल्हा ड्रग्ज रॅकेटमध्ये समोर आल्याने कळंब शहरासह राजकीय वर्तुळात मोठी खळबळ उडाली होती.
पक्षाने उचलेले तातडीचे पाऊल:
तुळजापूर येथील ड्रग्ज प्रकरणावेळी ठाकरे गटाचे आमदार कैलास पाटील आणि खासदार ओमप्रकाश राजेनिंबाळकर यांनी अत्यंत आक्रमक भूमिका घेत हा प्रश्न विधिमंडळातही उचलून धरला होता. त्यामुळे आता स्वतःच्याच पक्षातील नगरसेवकाला ड्रग्ज प्रकरणात अटक झाल्यानंतर पक्ष त्याला पाठीशी घालणार की कारवाई करणार, याकडे संपूर्ण जिल्ह्याचे लक्ष लागले होते.
अखेर, गुन्हेगारी प्रवृत्तीला आणि विशेषतः युवा पिढीला उद्ध्वस्त करणाऱ्या ड्रग्जसारख्या गंभीर गुन्ह्यात अडकलेल्या कोणालाही पक्ष खपवून घेणार नाही, असा स्पष्ट संदेश देत मोहसीन मिर्झा याची पक्षातून अधिकृतरीत्या हकालपट्टी करण्याचा निर्णय घेण्यात आला. आमदार कैलास पाटील यांनी या वृत्ताला दुजोरा दिला असून, या जलद कारवाईमुळे ठाकरे गटाने अमली पदार्थांविरोधातील आपली कडक भूमिका कायम असल्याचे स्पष्ट केले आहे.
आता या प्रकरणाच्या पुढील पोलीस तपासात मिर्झा याचे आणखी काही धागेदोरे समोर येतात का, आणि कळंब पोलिसांकडून या प्रकरणात काय पावले उचलली जातात, हे पाहणे महत्त्वाचे ठरणार आहे.
