तुळजापूर – “मी वन विभागाचा सचिव बोलत असून नळदुर्गजवळ माझ्या फॉर्च्युनर गाडीचा अपघात झाला आहे, मला मदतीची गरज आहे,” अशी बतावणी करून भाजपच्या तुळजापूर तालुकाध्यक्षांची ऑनलाइन आर्थिक फसवणूक केल्याचा धक्कादायक प्रकार समोर आला आहे. याप्रकरणी तुळजापूर पोलीस ठाण्यात एका भामट्याविरोधात गुन्हा दाखल करण्यात आला आहे.
नेमकी घटना काय?
तुळजापूरचे भाजप तालुकाध्यक्ष आनंद अरुण कंदले (वय ३९ वर्षे, रा. घाटशीळ रोड, तुळजापूर) यांच्या मोबाईलवर राजेंद्र पाटील नावाच्या व्यक्तीने (मोबाईल क्र. ७४९९०५६५२५) संपर्क साधला.
फोनवरील व्यक्तीने स्वतःची ओळख महाराष्ट्र राज्य वन विभागाचा ‘सचिव’ म्हणून करून दिली. “नळदुर्गजवळ माझ्या फॉर्च्युनर गाडीचा मोठा अपघात झाला असून, मी सध्या उपजिल्हा रुग्णालयात उपचार घेत आहे; मला तातडीने आपल्या मदतीची आवश्यकता आहे,” असे सांगून त्याने विश्वास संपादन केला. त्यानंतर उपचाराच्या व मदतीच्या नावाखाली त्याने आनंद कंदले यांच्याकडून संबंधित मोबाईल नंबरच्या फोन पे (PhonePe) खात्यावर परस्पर ७ हजार रुपये ट्रान्सफर करून घेतले.काही वेळातच आपली तोतया अधिकाऱ्याने फसवणूक केल्याचे लक्षात आल्यानंतर कंदले यांनी थेट पोलीस ठाण्यात धाव घेतली.
तुळजापूर पोलिसांत गुन्हा नोंद
याप्रकरणी आनंद कंदले यांनी २५ ऑगस्ट २०२६ रोजी दिलेल्या प्रथम खबरेवरून तुळजापूर पोलीस ठाण्यात आरोपी राजेंद्र पाटीलविरुद्ध तोतयागिरी व फसवणूक केल्याप्रकरणी भारतीय न्याय संहिता (BNS) कलम ३१९ अन्वये गुन्हा नोंदवण्यात आला आहे. या प्रकरणाचा पुढील तपास तुळजापूर पोलीस करत आहेत.
