ढोकी – भिकारसारोळा (ता. जि. धाराशिव) येथील पाण्याच्या टाकीजवळ मध्यरात्रीच्या सुमारास संशयास्पदरीत्या अंधारात दबा धरून बसलेल्या एका इसमाला ढोकी पोलीस ठाण्याच्या गस्ती पथकाने ताब्यात घेतले आहे. चोरी किंवा इतर गैरप्रकार (मालमत्तेविरुद्ध गुन्हा) करण्याच्या उद्देशाने फिरत असल्याच्या संशयावरून त्याच्याविरुद्ध महाराष्ट्र पोलीस कायद्यान्वये गुन्हा नोंदवण्यात आला आहे.
नेमकी कारवाई काय?
ढोकी पोलीस ठाण्याचे पथक ६ सप्टेंबर २०२६ रोजी मध्यरात्री १.०० वाजेच्या सुमारास पोलीस ठाण्याच्या हद्दीत पेट्रोलिंग करत होते. गस्त घालत असताना पथकास भिकारसारोळा येथील पाण्याच्या टाकीजवळ एक इसम अंधाराचा फायदा घेऊन संशयास्पद हालचाली करत दबा धरून बसलेला दिसून आला.
पोलिसांनी संशय आल्याने त्याला हटकले व त्याची कसून विचारपूस केली. त्यावेळी त्याने आपले नाव झिंग्या सरदार पवार (वय ४५ वर्षे, रा. जुना बस डेपो, पारधी पीडी, धाराशिव) असे सांगितले. मध्यरात्रीच्या अवेळी पाण्याच्या टाकीजवळ थांबण्याचे कारण विचारले असता त्याने पोलिसांना समाधानकारक उत्तर न देता उडवाउडवीची उत्तरे देण्यास सुरुवात केली.
महाराष्ट्र पोलीस कायद्यांतर्गत गुन्हा नोंद
संबंधित इसम हा चोरी किंवा इतर कोणताही गैरप्रकार करण्याच्या उद्देशानेच दबा धरून बसल्याचा पोलिसांचा संशय बळावल्याने त्यास तात्काळ ताब्यात घेण्यात आले. याप्रकरणी ढोकी पोलिसांनी सरकारतर्फे दिलेल्या फिर्यादीवरून झिंग्या पवार याच्याविरुद्ध महाराष्ट्र पोलीस कायदा कलम १२२ अन्वये गुन्हा दाखल केला आहे. या प्रकरणाचा पुढील तपास ढोकी पोलीस करत आहेत.
