परंडा / आंबी – परंडा तालुक्यातील उंडेगाव येथील वडार गल्लीत दुचाकी आडवी लावून कौटुंबिक वादातून एका ४५ वर्षीय इसमावर रामपुरी चाकूने प्राणघातक हल्ला केल्याची घटना समोर आली आहे. या हल्ल्यात इसम गंभीर जखमी झाला असून, याप्रकरणी आंबी पोलीस ठाण्यात भूम येथील दोन तरुणांविरुद्ध विविध गंभीर कलमांन्वये गुन्हा दाखल करण्यात आला आहे.
नेमकी घटना काय?
ताकमोडवाडी (ता. परंडा) येथील रहिवासी सुब्राव रामा भोसले (वय ४५ वर्षे) हे १० सप्टेंबर २०२६ रोजी सकाळी ११.०० ते ११.३० वाजेच्या सुमारास उंडेगाव येथील वडार गल्लीतून आपल्या मोटरसायकलवरून जात होते.
त्यावेळी भूम येथील रहिवासी विशाल उर्फ भैया सतीश भोसले आणि गणेश मच्छिंद्र काळे या दोघांनी आपली मोटरसायकल सुब्राव यांच्या दुचाकीसमोर आडवी लावून त्यांना अडवले. “तू माझ्या आईला कशाला बोलवतोस?” अशी विचारणा विशाल याने केली. त्यावर सुब्राव यांनी “मी कशाला बोलवू? ३५ वर्षे झाली सोडचिठ्ठी दिली आहे,” असे उत्तर दिले.
या उत्तराचा राग मनात धरून दोन्ही आरोपींनी सुब्राव यांना अश्लील शिवीगाळ करण्यास सुरुवात केली. त्यानंतर लाथाबुक्क्यांनी मारहाण करत धारदार रामपुरी चाकूने वार करून त्यांना गंभीर जखमी केले तसेच जीवे ठार मारण्याची धमकी दिली.
आंबी पोलिसांत दोघांवर गुन्हा नोंद
उपचार घेतल्यानंतर जखमी सुब्राव भोसले यांनी १८ सप्टेंबर २०२६ रोजी आंबी पोलीस ठाण्यात जाऊन फिर्याद दिली. त्यांच्या प्रथम खबरेवरून पोलिसांनी आरोपी विशाल उर्फ भैया सतीश भोसले आणि गणेश मच्छिंद्र काळे (दोघे रा. भूम) या दोघांविरुद्ध खालील कलमांन्वये गुन्हा नोंदवला आहे:
-
भारतीय न्याय संहिता (BNS): कलम १२६(२), ११८(२), ११८(१), ३५१(२)(३), ३५२ आणि ३(५).
या प्रकरणाचा पुढील तपास आंबी पोलीस करत आहेत.
