नमस्कार वाचकहो! ‘धाराशिव लाइव्ह’च्या या भन्नाट मालिकेत आज आपण फेसबुक पिंट्या साहेबांच्या ‘क्रेडिट लाटण्याच्या’ एका महा-विनोदी आजाराची लक्षणे पाहणार आहोत. मराठीत एक अत्यंत प्रसिद्ध म्हण आहे- ‘उतावळा नवरा आणि गुडघ्याला बाशिंग’! ही म्हण जर कोणासाठी तंतोतंत बनवली असेल, तर ती फक्त आणि फक्त आपल्या ‘फेसबुक पिंट्या’ साहेबांसाठी!
शेतकरी संकटात असताना साहेब प्रत्यक्ष मैदानातून कसे गायब असतात आणि श्रेय घेण्यासाठी फेसबुकवर कसे प्रकट होतात, याचा हा सर्वात मोठा पर्दाफाश!
१. शेतकरी वाऱ्यावर, पंचनाम्याला मुहूर्त अन् साहेब गायब!
गेल्या दोन महिन्यांपासून धाराशिव जिल्ह्यात पावसाचा थेंब नाही. भीषण कोरडा दुष्काळ पडलाय. शेतकऱ्यांचे सोयाबीन करपून गेले आहे, फळबागा उद्ध्वस्त होण्याच्या मार्गावर आहेत आणि जनावरांच्या चारा-पाण्याचा प्रश्न अत्यंत बिकट झाला आहे. शेतकरी बांधव ‘तात्काळ पंचनामे करा’ अशी विनंती करत आहेत, पण निर्दयी सरकारने चक्क ‘५ ऑक्टोबर’चा मुहूर्त काढला आहे!
शेतकऱ्यांच्या या संतापावर शिवसेना (ठाकरे गट) आक्रमक झाली. याच पार्श्वभूमीवर नांदेडमध्ये महसूल विभागाची दुष्काळ व पीक परिस्थितीबाबत आढावा बैठक आयोजित करण्यात आली होती. या बैठकीला कृषिमंत्री दत्तामामा भरणे आणि ऊर्जा राज्यमंत्री मेघनाताई बोर्डीकर उपस्थित होत्या. जिल्ह्याचे प्रश्न मांडण्यासाठी ठाकरे गटाचे आमदार कैलास पाटील आणि प्रवीण स्वामी हजर होते… पण स्वतःला ‘जिल्ह्याचे मुख्यमंत्री’ समजणारे आपले फेसबुक पिंट्या साहेब मात्र या महत्त्वाच्या बैठकीला दांडी मारून गायब होते!
२. कैलास पाटलांचा दणका अन् पिंट्या साहेबांची उडालेली झोप!
बैठकीत आमदार कैलास पाटील यांनी मंत्र्यांना थेट अंगावर घेत जाब विचारला. “दुष्काळी परिस्थितीमुळे शेतकरी आधीच मोठ्या संकटात आहे, त्यात पिकांना पाण्याची नितांत गरज असताना ‘इमर्जन्सी लोडशेडिंग’चा अतिरिक्त भार शेतकऱ्यांच्या माथी का मारताय?” असा थेट आणि खडा सवाल त्यांनी उपस्थित केला.
कैलास पाटलांच्या या आक्रमक भूमिकेची आणि मंत्र्यांची बोलती बंद केल्याची व्हिडिओ क्लिप सोशल मीडियावर वाऱ्यासारखी व्हायरल झाली. इकडे घरात बसलेल्या फेसबुक पिंट्या साहेबांनी ही क्लिप पाहिली आणि साहेबांच्या पायाखालची वाळूच सरकली! आपलं ‘क्रेडिट’ चाललंय हे बघून साहेबांनी लगेच आपला ‘फेसबुक’चा स्टुडिओ उघडला.
३. घोंगडी बैठकीचे नाटक अन् एका तासात दोन पोस्ट!
डॅमेज कंट्रोल करण्यासाठी साहेबांनी लगबगीने काही शेतकऱ्यांना गोळा केले आणि ‘घोंगडी बैठकीचा’ एक इव्हेंट उरकून घेतला. लगेच पहिली फेसबुक पोस्ट पडली- “आज शेतकरी बांधवांसोबत घोंगडी बैठकीत संवाद साधला. जिल्ह्यात दुष्काळ जाहीर करण्यात यावा, यासाठी आपला आग्रही पाठपुरावा सुरू आहे…” इथपर्यंत ठीक होतं.
पण साहेबांच्या अंगात श्रेय लाटण्याची जी खाज आहे, ती त्यांना गप्प बसू देईना. अवघ्या एका तासाने साहेबांनी दुसरी पोस्ट टाकून थेट “धाराशिवच्या आठही तालुक्यांत तीव्र दुष्काळ जाहीर होणार!” अशी थेट ‘घोषणा’च करून टाकली!
४. निर्णय ३० सप्टेंबरला, पण साहेबांचे ‘बाशिंग’ आधीच तयार!
अरे साहेब! अजून पंचनाम्यांचा पत्ता नाही, अधिकारी बांधावर गेलेले नाहीत आणि राज्य शासन या दुष्काळाबाबत अधिकृत निर्णय ३० सप्टेंबर रोजी घेणार आहे. पण शासनाच्या आधीच साहेबांनी स्वतःला ‘मुख्यमंत्री’ समजून दुष्काळ जाहीर पण करून टाकला! कैलास पाटलांनी केलेल्या संघर्षाचे आयते श्रेय लाटण्यासाठी साहेबांची ही सगळी धडपड सुरू होती.
तात्पर्य: शासनाचा निर्णय येईपर्यंत साहेबांना दम निघाला नाही. फेसबुक पिंट्या म्हणजे ‘स्वतः काही करायचे नाही, पण दुसऱ्याने आणलेल्या मांडवात स्वतःच्याच लग्नाचे बाशिंग बांधून नाचायचे!’ साहेबांचा हा ‘फेसबुकिया’ दुष्काळ बघून आता करपलेलं सोयाबीन पण हसायला लागलं असेल.
कारण विसरू नका… “यह पब्लिक है, सब जाणती है!”
