कळंब – कळंब तालुक्यातील हासेगाव शिवारात चारित्र्यावर संशय घेऊन एका पतीने स्वतःच्या पत्नीची चैन आणि दगडाने डोक्यात मारहाण करून निर्घृण हत्या केल्याची धक्कादायक घटना समोर आली आहे. या थरारक हत्याकांडामुळे परिसरात मोठी खळबळ उडाली असून, मयत महिलेच्या वडिलांच्या फिर्यादीवरून कळंब पोलीस ठाण्यात संशयित पतीविरुद्ध खुनाचा गुन्हा दाखल करण्यात आला आहे.
नेमकी घटना काय?
पुनर्वसन सावरगाव (ता. कळंब, जि. धाराशिव) येथील रहिवासी कोमल गणेश उर्फ विनायक टेकाळे या विवाहितेवर तिचा पती गणेश उर्फ विनायक शिवाजी टेकाळे हा सातत्याने चारित्र्याचा संशय घेत होता.
७ ऑक्टोबर २०२६ रोजी दुपारी २.३० ते सायंकाळी ६.०० वाजेच्या सुमारास हासेगाव शिवारातील मानधने पेट्रोल पंपासमोरील शेतात नेऊन आरोपी पतीने कोमल यांच्याशी वाद घातला. वादाचे पर्यावसान विकोपाला गेल्यानंतर आरोपीने लोखंडी चैन आणि जमिनीवरील दगडाने कोमल यांच्या डोक्यात जबर प्रहार केले. या अमानुष व प्राणघातक मारहाणीत गंभीर जखमी होऊन कोमल टेकाळे यांचा जागीच तडफडून मृत्यू झाला.
वडिलांच्या फिर्यादीवरून खुनाचा गुन्हा नोंद
मुलीच्या निर्घृण हत्येची माहिती मिळाल्यानंतर मयत कोमलचे वडील बंडू विश्वांभर पवार (वय ५१ वर्षे, रा. करंजकल्ला, ता. कळंब) यांनी ८ ऑक्टोबर २०२६ रोजी कळंब पोलीस ठाण्यात धाव घेऊन फिर्याद दिली. त्यांच्या प्रथम खबरेवरून पोलिसांनी संशयित पतीविरुद्ध गुन्हा दाखल केला आहे:
-
आरोपी : गणेश उर्फ विनायक शिवाजी टेकाळे (रा. पुनर्वसन सावरगाव, ता. कळंब, जि. धाराशिव).
-
दाखल कलम : भारतीय न्याय संहिता (BNS) कलम १०३(१) (खून).
घटनेची माहिती मिळताच कळंब पोलिसांनी घटनास्थळी धाव घेऊन पंचनामा केला असून, मृतदेह शवविच्छेदनासाठी पाठवून दिला. पतीकडूनच पत्नीची अशा क्रूर पद्धतीने हत्या झाल्याने हळहळ व्यक्त होत असून, या प्रकरणाचा पुढील तपास कळंब पोलीस करत आहेत.
