धाराशिव : जिल्ह्यातील विविध पोलीस ठाण्यांच्या हद्दीत चोरीच्या सहा घटना समोर आल्या असून, यामध्ये जनावरे, वाहनांचे टायर, सोलार प्लांटमधील केबल, बॅटरी तसेच लोखंडी साहित्य असा लाखो रुपयांचा ऐवज चोरीला गेला आहे. या सर्व प्रकरणांमध्ये संबंधित पोलीस ठाण्यांत 12 ऑक्टोबर रोजी गुन्हे दाखल करण्यात आले आहेत.
लोहारा शहरात दुकानातून लोखंडी साहित्य चोरी
लोहारा पोलीस ठाण्याच्या हद्दीत अंकुश श्रीहरी नारायणकर यांच्या दुकानात अनधिकृत प्रवेश करून दोन लोखंडी पत्रे आणि चार लोखंडी अँगल असा सुमारे 8 हजार रुपयांचा माल चोरीला गेला. या प्रकरणी फिरोज खुर्शीद बांधार आणि शामसुंदर भिमराव नारायणकर, दोघेही रा. लोहारा बु., यांच्याविरुद्ध भारतीय न्याय संहितेच्या कलम 305(अ), 3(5) अन्वये गुन्हा दाखल करण्यात आला आहे.
परंडा शिवारातून दोन जर्शी गायी चोरीला
परंडा शिवारातील गट क्रमांक 278 मधील गोठ्यातून दोन जर्शी गायी चोरीला गेल्याची घटना घडली. नितीन दादा राउत यांच्या मालकीच्या या गायींची किंमत सुमारे 35 हजार रुपये आहे. 9 ऑक्टोबरच्या रात्री 8 ते 10 ऑक्टोबरच्या सकाळी 6 वाजण्याच्या दरम्यान अज्ञात व्यक्तीने ही चोरी केल्याचे फिर्यादीत नमूद आहे. परंडा पोलीस ठाण्यात भा.न्या.सं. कलम 303(2) अन्वये गुन्हा दाखल करण्यात आला आहे.
नळदुर्गजवळ कंटेनरमधून 13 टायर चोरी
चाकण एमआयडीसी येथून ब्रिजस्टोन कंपनीचे टायर घेऊन हैदराबादकडे निघालेल्या कंटेनरमधून 13 टायर चोरीला गेल्याची घटना समोर आली आहे. 29 सप्टेंबर रोजी फुलवाडी टोलनाका ते मुर्टा पाटी दरम्यान ही चोरी झाल्याचे फिर्यादी संजय सुरेश बकावले यांनी सांगितले. चोरीला गेलेल्या टायरची किंमत सुमारे 74 हजार 100 रुपये आहे. नळदुर्ग पोलीस ठाण्यात अज्ञात व्यक्तीविरुद्ध भा.न्या.सं. कलम 303(2) अन्वये गुन्हा दाखल करण्यात आला आहे.
ढोकीतील सोलार प्लांटमधून 70 हजारांची केबल लंपास
ढोकी शिवारातील व्ही.एम.आर. ग्रीन एजन्सीच्या सोलार प्लांटमधील इन्व्हर्टर क्रमांक 5 च्या तीन स्ट्रिंगची केबल तसेच जंक्शन बॉक्सची केबल असा सुमारे 70 हजार रुपयांचा ऐवज चोरीला गेला. 15 सप्टेंबर रोजी मध्यरात्री ही घटना घडली. याप्रकरणी ज्ञानेश्वर केंचे यांच्या फिर्यादीवरून ढोकी पोलीस ठाण्यात भा.न्या.सं. कलम 303(2), 324(5) अन्वये गुन्हा दाखल करण्यात आला आहे.
मुरुम परिसरात दोन बॅटऱ्या चोरीला
सुंदरवाडी शिवारातील सी.आर.एस. इन्फ्रा प्लॉटमधून अज्ञात चोरट्यांनी ॲमरोन कंपनीची एक आणि एक्साईड कंपनीची एक अशा दोन बॅटऱ्या चोरून नेल्या. 11 ऑक्टोबरच्या रात्री 10 ते 12 ऑक्टोबरच्या सकाळी 6 वाजण्याच्या दरम्यान ही घटना घडली. चोरीच्या बॅटऱ्यांची किंमत सुमारे 8 हजार रुपये आहे. याप्रकरणी सचिन भिमराज पाटील यांच्या फिर्यादीवरून मुरुम पोलीस ठाण्यात गुन्हा दाखल करण्यात आला आहे.
माणकेश्वर शिवारातून दोन म्हशी, एक रेडी चोरीला
माणकेश्वर शिवारातील शेत गट क्रमांक 1033 मधील पत्र्याच्या शेडमधून दोन म्हशी आणि एक रेडी चोरीला गेली. महावीर ज्ञानोबा जैन यांच्या मालकीच्या या जनावरांची किंमत सुमारे 85 हजार रुपये आहे. 10 ऑक्टोबरच्या रात्री 7.30 ते 11 ऑक्टोबरच्या पहाटे 4 वाजण्याच्या दरम्यान अज्ञात व्यक्तीने ही जनावरे चोरून नेली. याप्रकरणी परंडा पोलीस ठाण्यात भा.न्या.सं. कलम 303(2) अन्वये गुन्हा दाखल करण्यात आला आहे.
जिल्ह्यातील या विविध चोरीच्या घटनांमध्ये एकूण सुमारे 2 लाख 80 हजार रुपयांचा मुद्देमाल चोरीला गेल्याची नोंद पोलिसांकडे झाली आहे. संबंधित पोलीस ठाण्यांकडून पुढील तपास सुरू आहे.
